Тошкент шаҳар ҳокими Жаҳонгир Ортиқхўжаев «Салар» маиший оқова сувларини тозалаш иншоотидан тарқалаётган ёқимсиз ҳидни йўқотиш юзасидан 5 июнь, шанба куни йиғилиш ўтказди, деб хабар бермоқда пойтахт ҳокимлиги матбуот хизмати.
Йиғилишда маҳалла фуқаролари, раислари, депутатлар, мутасадди ташкилотлар раҳбарлари иштирок этган.
«Ҳар бир фуқаронинг ва маҳалла раисининг фикри эшитилганидан сўнг шаҳар ҳокими томонидан муаммони бартараф этиш юзасидан мутасаддиларга зарур топшириқлар берилди», — дейилади ҳокимлик хабарида.
Маҳалла фуқаролари ва ташкилот раҳбарларидан иборат ишчи гуруҳи шакллантирилиб, маҳалла фуқароларидан муаммонинг ҳал этилиши жараёнлари устидан жамоатчилик назоратини ўрнатиш белгиланган.
Ўтган ҳафтада пойтахт ҳокимлиги вакиллари Сергели туманидаги «Ўзгариш» ва «Нўғайқўрғон» маҳаллаларига кечки пайт мунтазам ёқимсиз ҳид тарқатаётган, «Тошкент шаҳар сув таъминоти» масъулияти чекланган жамияти тасарруфидаги «Салар» маиший оқова сувларини тозалаш иншоотини кўздан кечирган эди.
Мазкур иншоотда Миробод, Сергели, Яккасарой, Мирзо Улуғбек, Чилонзор ва Янгиҳаёт туманларининг маиший оқова сувлар тармоғи орқали оқиб келаётган оқова сувлар тозаланади. У пойтахтдаги маиший оқова сувларни қайта ишлашга мўлжалланган 3 та иншоотнинг энг каттаси ҳисобланади ва бир кеча-кундузда 900 минг кубгача оқова сувларни тозалайди.
Иншоотга аҳоли ва корхоналар томонидан кириб келадиган оқова сувлар учун алоҳида қувурлар ётқизилган ва улар воситасида ёқимсиз ҳид айнан қаердан келаётганлигига аниқлик киритиш мумкин.
«Мутасаддиларнинг сўровига кўра, терини қайта ишлаш ва бошқа корхоналар томонидан оқизилаётган оқова сувларга эътибор қаратилди. Улардан кузатув пайтида оқова сувларни иншоотга йўналтириш сўралди ва вазият кузатувга олинди. Буни қарангки, шу пайтда иншоотга қоп-қора рангли ва ниҳоятда ёқимсиз ҳидли оқова сувлар келиб қўшилди. Бу тадбиркорлик субъектларининг фаолиятини бевосита назорат қилишни тақозо қилади», — дейилади хабарда.
Шунингдек, қайд этилишича, чиқинди сувларни тозалаш жиҳозлари қиммат бўлиб, улар хориждан олиб келинади. «Бундай маблағлар барча тадбиркорлик корхоналарида ҳам мавжуд эмас», — деб таъкидланган хабарда.
«Ҳукуматимизнинг бир қатор қарорларига кўра, тадбиркорлар фаолиятига аралашиш қатъиян ман қилинади. Шу боис корхоналар ҳудудига кириб, чиқиндилар қай тарзда оқова сув тармоқларига оқизилаётгани билан бевосита танишиш мумкин эмас. Шу боис баъзи тадбиркорлар масъулиятни унутиб, ўз билганларича иш тутишмоқда. Оқибатда атроф-муҳитга, аҳолига зарар етказиляпти», — деб таъкидланмоқда хабарда.
«‘Тошкент шаҳар сув таъминоти’ МЧЖ мутасаддилари вилоят ҳокимликлари ва хўжалик юритувчи субъектлар раҳбарлари билан биргаликда муаммони чуқур ўрганиб, ечимини топиши лозим», — дея якунланган ҳокимлик хабари.
Эслатиб ўтамиз, май ойининг бошларида Ўзбекистон Экологик партияси мазкур ҳолатга муносабат билдириб, сув тозалаш иншооти ва унинг атрофидаги корхоналар томонидан атроф табиий муҳитга етказилаётган зарар атрофлича ўрганиб чиқилиши ҳамда бундай салбий ҳолатларни бартараф этиш бўйича тегишли чоралар кўрилиши лозимлигини таъкидлаганди.
Олий Мажлис Сенати матбуот хизмат чиқинди сувларни ифлослантирадиган бир қатор корхоналарни тозалаш иншоотларини реконструкция қилиш тўғрисида ҳукумат қарори лойиҳаси тайёрланаётганини маълум қилганди.
Изоҳ (0)