Andijonda TikTok uchun IIB xodimining xizmat mashinasini haydagan 19 yoshli “moykachi”ga chora ko‘rildi, deb xabar beradi IIV YHXBB axborot xizmati.
Ijtimoiy tarmoqlarda “Siz mabodo tiktokchi emasmisiz?” sarlavhasi ostida video tarqaldi. Unda “avtomoyka” ishchisi YHXB xodimining xizmat avtomobilida “migalka”ni yoqqan holda harakatlangani tasvirlangan.
Ma’lum qilinishicha, 6-iyun kuni Andijon viloyati Marhamat tumani IIB YHXB katta inspektori O.Karimov tushlik vaqtida Lacetti rusumli maxsus xizmat mashinasini yuvdirib olish uchun idora binosi yaqinida joylashgan avtomobillarni yuvish shoxobchasiga olib kirgan.
Avtomashinalarni yuvish bilan shug‘ullanuvchi 2002-yilda tug‘ilgan fuqaro N.A. xizmat avtomobilini shoxobcha hududida boshqarib, uni videoga olgan va TikTok’ga joylashtirgan.
Holat o‘rganilib, YHXB katta inspektori O.Karimov va fuqaro N.A.ga nisbatan Ma’muriy Javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 2-qismi tartibida bayonnoma tuzilgan va BHMning 5 baravari (1,225 ming so‘m) miqdorida jarima belgilangan.
Avvalroq Toshkentda ichki ishlar xodimi kiyimini kiyib, mashina kapoti ustida videoga tushgan yigit va uning sherigi 5 sutkaga, Sirdaryoda esa ichki ishlar xodimi kiyimida raqsga tushgan yigit 8 sutkaga qamalgani to‘g‘risida xabar berildi.
Izoh (0)