Samarqand Yevropa tiklanish va taraqqiyot banki (YeTTB)ning qiymati 3 milliard yevroni tashkil etgan “Yashil shaharlar” dasturiga qo‘shilib, barqaror rivojlanishni rejalashtirishni takomillashtiradigan birinchi shahar bo‘ldi. Bu haqda bank matbuot xizmati Spot’ga ma’lum qildi.
Barqaror rivojlanish dasturiga qo‘shilish orqali shaharlar loyiha (Samarqand misolida bu elektrobuslarga investitsiya kiritish bo‘lishi kutilmoqda) ishga tushiradi va shaharni ko‘kalamzorlashtirish bo‘yicha reja ishlab chiqadi, unda atrof-muhit holatini yaxshilash bo‘yicha keyingi harakatlar bayon etiladi.
O‘zbekistondagi elektrobuslar
2019-yilda Toshkentda bitta elektrobus sinovdan o‘tkazildi, ammo bitta elektrobusning harakatlanishi moddiy jihatdan o‘zini oqlamasligi ma’lum bo‘ldi.
2021—2023-yillarda Toshkentga 1 trillion so‘mga 300 ta elektrobus sotib olish rejalashtirilayotgani xabar qilindi. O‘sha yilning noyabr oyida SamAuto “Toshshahartransxizmat” AJga sinov elektrobusini taqdim etdi va 2022-yilgacha elektrobuslar ishlab chiqarishni o‘zlashtirishini ma’lum qildi.
YeTTBning 2016-yilda tashkil etilgan “Yashil shaharlar” dasturi har bir ishtirokchi shaharga kamroq uglerodli va yanada barqaror kelajakka qarab harakatlanishga qaratilgan noyob chora-tadbirlar kombinatsiyasi orqali yechimlarni uning ekologik ehtiyojlariga moslashtirishda yordam beradi. Jahon miqyosida chiqindi gazlarining to‘rtdan uch qismi shaharlar hisobiga to‘g‘ri keladi. Bugungi kunga kelib YeTTB O‘zbekiston iqtisodiyotiga 97 loyiha doirasida 2,4 milliard yevrodan ortiq mablag‘ kiritgan.
Izoh (0)