Hind aktrisalari Vijayantimala va Shridevi o‘rtasida qanday o‘xshashliklar bor?

30 yil vaqt bilan 13-avgustda Hindistonning janubida tavallud topgan aktrisalar Vijayantimala va Shridevining karyerasida ajoyib o‘xshashliklar bor.

Shridevi 1963-yil Minampattida, Vijayantimala esa Triplikanda dunyoga kelgan. Har ikkala aktrisa ham kinosanoatda bolaligidan suratga tusha boshlagan.

Vijayantimala 13 yoshida “Hayot” filmida rol ijro qilgan. Shridevi “Thunaivan” filmida suratga tushganida 4 yoshda bo‘lgan. Debyutidan ikki yil o‘tib Vijayantimala ijrosidagi hind filmi — “Bahor” ekran yuzini ko‘rgan. Uning muvaffaqiyatidan keyin mamlakat janubidagi boshqa aktrisalarga Bollivudda yo‘l ochilgan.

Shridevining hind kinosanoatidagi ilk kinosi tamil filmi “O‘n olti yoshda”ning remeyki Solva Sawan bo‘lgan. Film ekran yuzini ko‘rganida uning yoshi 16 da bo‘lgan. Avvalroq “Juli”(1975) filmida bosh qahramonning singlisini gavdalantirgan.

Ikkala aktrisa ham ilon haqidagi mashhur filmlarda suratga tushgan. Vijayantimala “Nagin” musiqiy filmida raqib qabila vakilining o‘g‘liga ko‘ngil qo‘ygan sardorning qizi sifatida ko‘rinish bergan.

Shridevi esa 1986-yilda “Nagina / Sehrli olmos” filmida qaylig‘ining qasosini olish uchun odamga aylanadigan ilon — Rajni rolini ijro qilgan. 1986-yilda filmning ikkinchi qismi “Sehrli olmos. Ikkinchi film” taqdim qilingan.

Ikkala aktrisa ham raqsga tushish borasida o‘z ishining ustasi bo‘lgan. Vijayantimala “Amrapali” (1966) filmida professional darajada raqsga tushgan bo‘lsa, Shridevi 1989-yilda suratga olingan “Chandni” filmida o‘z ijrosi bilan ommani lol qoldirgan.