Bollivud yulduzi sifatida yaxshi tanish bo‘lgan tug‘ishgan yulduzlar haqida ma’lumot berib o‘tamiz.

Sanni va Bobbi Deollar

Foto: “Yandeks Dzen”

Dxarmendraning Hema Malinidan avval ham turmushi bo‘lgan. Birinchi rafiqasi Prakash Kaur Sanni va Bobbi Deollarni dunyoga keltirgan. Aksariyat yulduzlar singari aka-ukalar ham kinosanoatda karyera qilishga qaror qilgan. Bobbi akasidan avvalroq suratga tushgan hamda “Sevgining abadiy ertagi” filmida otasining bolaligi rolini ijro qilgan. “Sevgining kuchli” filmida debyut rol ijro qilgan Sanni esa shundan keyin faol suratga tusha boshlagan. Bir qancha loyihalarda ishtirok etganiga qaramay, Bobbi akasicha, kinosanoatda muvaffaqiyatga erisha olmagan. Vaqt o‘tishi bilan Sannining o‘zi film suratga olishni boshlagan va ukasiga ham ijro qilish uchun rol berishga harakat qilgan.

Kajol Devgan va Tanisha Mukerji

Foto: “Yandeks Dzen”

Tanuja va Shomu Mukerjining farzandlari ham ota-onasi singari san’atni tanlagan. 1975-yilda dunyoga kelgan Kajol 16 yoshida “Haqiqiy sevgi” filmida suratga tushgan. Filmlari muxlislar qalbidan joy olgan aktrisa har bir ijrosidan keyin mashhurlikka erishib borgan. Ajay Devgan bilan suratga olish maydonchasida tanishgan juftlik turmush qurishga qaror qilgan. 20 yildan buyon birga yashaydigan yulduzlarning ikki nafar farzandi bor. Aktyor va aktrisaning har ikkalasi ham vaqtini oilasiga bag‘ishlashga hamda faoliyatini ham tashlab qo‘ymaslikka harakat qiladi. Ilk marta 2003-yilda suratga tushgan singlisi Tanisha esa Kajolchalik mashhurlikka erisha olmagan. Muxlislar, tomoshabin va OAV ularni taqqoslab, Tanishani iste’dodi yo‘q deb atagan.

Nutan Bexl va Tanuja

Foto: “Yandeks Dzen”

Shobxna Samart va Kumarsen Samartning farzandlari Tanuja va Nutanni muxlislar yaxshi taniydi. Ilk bor 1950-yilda suratga tushgan Nutan “Sima” filmidagi ijrosi sabab Filmfare mukofotini ham qo‘lga kiritib ulgurgan. Muvaffaqiyatga erishishda davom etayotgan aktrisa 1991-yilda ko‘krak saratonidan vafot etgan. Opasi bilan birga “Bizning qizimiz” filmida debyut rol ijro qilgan Tanuja 1965-yilda “Oy va quyosh” filmida ham suratga tushgan. Bir qancha filmlarda asosiy va ikkinchi darajali qahramonni gavdalantirganidan keyin ikki marta Filmfare mukofotini qo‘lga kiritgan. Shomuga turmushga chiqqan aktrisa Kajol va Tanishani dunyoga keltirgan. Ajrashganidan keyin esa qizlarining tarbiyasi bilan band bo‘lgan. Opa-singillar orasida Nudan ko‘proq muvaffaqiyatga erishgan. 5 marta Filmfare’ni va Padma Shri mukofotini qo‘lga kiritgani esa buning isboti.

Karishma va Karina Kapur

Foto: “Yandeks Dzen”

Randhir Kapur va Babitaning qizlari ham Bollivudda yetarlicha muvaffaqiyat qozonib ulgurganlardan. 1991-yilda ilk bor suratga tushgan qizlarning to‘ng‘ichi Karishma o‘ziga xos tashqi ko‘rinishi va qaddi-qomati, yaxshi raqsga tushishi bilan yetarlicha e’tibor tortib ulgurgan. Haqiqiy mashhurlikka 1996-yilda “Radja Hindustani” filmida Amir Xon bilan suratga tushganidan keyin erishgan. Aynan mazkur roli sabab u Filmfare mukofotini “Eng yaxshi aktrisa” sifatida qo‘lga kiritgan. Aktrisa turmushga chiqqanidan keyin faoliyatida ijodiy tanaffus kuzatilgan. 2000-yildan suratga tushishni boshlagan Karina esa “Gohi shodlik, gohi g‘am”, “Men Premning ma’shuqasiman” va boshqa filmlardagi ijrosidan keyin yetarlicha tanilib ulgurgan. Mukofotlar qo‘lga kiritish va mashhurlikka erishish borasida opasidan o‘zib ketgan Kapur xonim Bollivud yulduzi Saif Ali Xon bilan turmush qurgan. Ayni vaqtda ikkinchi marta homilador bo‘lgan aktrisa oilasi va karyerasini muvozanatda ushlashga harakat qiladi.

Rishi, Randxir va Rajiv Kapurlar

Foto: “Yandeks Dzen”

Krishna Kapur bilan turmush qurgan Raj Kapurning uch o‘g‘il va ikki nafar qiz farzandi bo‘lgan. O‘g‘illari qizlardan farqli o‘laroq san’at bilan hayotini bog‘lashni istagan. To‘ng‘ich farzand Randxir bolaligida “Janob 420”da suratga tushganini aytmaganda, haqiqiy faoliyatini 1971-yilda boshlagan. 1987-yildan boshlab aktyor ijodida o‘n yillik tanaffus kuzatilgan. 1997-yildagi ijrosi esa muvaffaqiyatsiz chiqqan. 1999-yildagi “Ona” filmining natijasi esa unchalik yomon bo‘lmagan. Rishini debyutining o‘ziyoq unga omad keltirgan. “Bobbi” filmidagi ijrosi sabab mashhurlikka erishgan aktyor suratga tushish va ijoddan to‘xtamagan. Nita Singx bilan turmush qurgan o‘g‘li

Ranbir ham kasb borasida otasidek tanlov qilgan. Millionlab muxlislarning mehriga sazovor bo‘lgan Rishi Kapur 2020-yil 30-aprelda vafot etgan. 1983-yilda suratga tushishni boshlagan Rajiv ham bir qancha urinishiga qaramay, Rishichalik mashhur bo‘la olmagan. U 2021-yil 9-fevral kuni miokard infarktidan vafot etgan.

Salmon Xon, Arbaaz va Soxail Xon

Foto: “Yandeks Dzen”

Salmon Xonning Arbaaz va Soxail Xon ismli ikki nafar ukasi bor. Ulardan birinchi bo‘lib tabiiyki, Salmon suratga tushishni boshlagan. Debyut roli 1989-yilda bo‘lgan aktyor karyerasining ikkinchi yilidayoq Filmfare mukofotini qo‘lga kiritgan. Rejissorlar uni filmning muvaffaqiyatli chiqishi garovi deb hisoblagan va ijro qilish uchun takliflar soni uzilmagan. Ukasi Arbaaz esa ilk bor 1996-yilda ekranda ko‘rinish bergan. U ham Filmfare’ni qo‘lga kiritgani bilan akasi singari muxlislar qalbidan joy ololmagan. Shundan keyin Arbaaz Productions kinokompaniyasini tashkil qilgan. Soxail Xon akalaridan farqli o‘laroq, karyerasini rejissorlikdan boshlagan. 2002-yilda esa aktyor sifatida ishtirok etgan film taqdim qilingan. Akalari singari kinosanoatda mashhurlikka erisha olmagan Soxail shaxsiy hayotda ulardan omadliroq hisoblanadi.

Raj, Shammi va Shashi Kapur

Foto: “Yandeks Dzen”

Pritxviraj Kapur va Ramsarning turmushidan 6 nafar farzandi bo‘lgan, ulardan 2 nafari vafot etgan. Bolaligi teatr va suratga olish maydonchalarida o‘tgan Raj nafaqat aktyor, balki rejissor sifatida ham faoliyat olib borgan. Shammi Kapur ham karyerasini “Pritxvi” teatrida boshlagan, 50-yillarda esa kinoda suratga tusha boshlagan. Faoliyati davomida Rajchalik mashhurlikka erisha olmagan Shammi 2011-yilning 14-avgustida vafot etgan. Aka-ukalarning kenjasi Shashi ham karyerasini teatrda rol ijro qilishdan boshlagan. 1961-yil filmda debyut rol o‘ynagan aktyor 70-80-yillarda hind kinosidagi eng yaxshi aktyorlardan biri bo‘lgan. Xorijiy filmlarda suratga tushgan Shashi amerikalik va britaniyalik ijodkorlar bilan hamkorlik qilgan. Muvaffaqiyat borasida Raj rejissor, Shashi esa aktyor sifatida yetakchi bo‘lgan.

Saif Ali Xon va Soxa Ali Xon

Foto: “Yandeks Dzen”

Sharmila Tagor Mansur Alixon Pataudi bilan turmush qurgan. Saif Ali Xondan keyin, Soxa Ali Xon dunyoga kelgan. Aktyor sifatida yaxshi ma’lum bo‘lgan Saif Ali Xon 1991-yilda Amrita Singx bilan turmush qurgan. Debyut roli 1993-yilda bo‘lgan aktyor faoliyati davomida bir qancha esda rollar ijro qilgan va nufuzli kinomukofotlar bilan taqdirlangan. Ayni vaqtda ham suratga tushishda davom etayotgan aktyor ishtirokidagi deyarli barcha loyihalar muvaffaqiyatli chiqadi. Singlisi Soxa esa ilk marta 2004-yilda suratga tushishni boshlagan. Kinosanoatda muvaffaqiyatga erisha olmagan Soxa 2015-yilda Kunal Kxem bilan turmush qurgan. To‘yida akasi va uning rafiqasi Karina Kapur ham ishtirok etgan.

Puja va Aliya Bxatt

Foto: “Yandeks Dzen”

Maxesh Bxattning farzandlari orasida Puja katta, Aliya esa kenja farzand hisoblanadi. Puja 1989-yilda ijro qilgan debyut roli uchun Filmfare mukofotiga sazovor bo‘lgan. 1991-yildagi “Yurakka buyruq berib bo‘lmaydi” filmi omadli chiqqan aktrisa 2001-yil muxlislarga so‘nggi marta ko‘rinish bergan. Shundan keyin faoliyatini rejissor va prodyuser sifatida davom ettirgan. Aliya Bxatt esa bolaligida ilk bor 1999-yilda suratga tushgan. O‘smirligidagi debyuti esa 2012-yilda bo‘lgan. Karan Johar suratga olgan “Yil talabasi” aktrisani mashhurlikka erishishiga sababchi bo‘lgan. Aliya aktrisalikda opasini ortda qoldirgan, Puja esa kinosanoatda prodyuser va rejissor sifatida o‘z o‘rnini topgan.