Вильнюсда пандемия чекловлари сабаб саёҳатларни амалга ошира олмаётган аҳоли учун Польшанинг Люблин шаҳрига элтадиган «дарвоза» пайдо бўлди, деб хабар беради Hi-Tech.Mail.ru.
Лойиҳа илмий-фантастик фильмлардаги порталларни ёдга солади ва одамларни «бирлик ғоясини қайта кўриб чиқиш»га ундайди.
Мазкур иморат экран ва камерага эга юмалоқ эшик кўринишида. Бу каби «эшик» иккита турли шаҳарга ўрнатилган. Вильнюсда, масалан, у темир йўл вокзалида жойлашган. Битта порталнинг камераси унинг атрофдаги барча нарсани тасвирга олиб, уни иккинчи портал экранига узатади. Унинг ёнидан ўтиб кетаётган инсонлар бошқа бир мамлакатда реал вақт режимида нималар содир бўлаётганини кузата олади.
«Инсоният ижтимоий қутбланиш, иқлим ўзгариши ёки иқтисодий муаммолар каби кўплаб потенциал хавфларга дучор бўлмоқда. Бироқ яхшилаб эътибор қаратилса, ушбу муаммолар ажойиб олимлар, фаоллар, етакчилар, билим ёки технологиянинг етишмаслиги оқибатида юзага келмаган. Мазкур трайбализм дунёга миллий чегараларимиз билан чекланган ҳолда тор қараш ва ҳамдардлик ҳиссининг йўқлиги ҳисобланади», — дейди лойиҳа ташаббускор Бенедиктас Гилис. Унинг фикрича, рақамли портал — бу «ўтмишдаги хурофот ва келишмовчиликлардан устун бўлишга чақирувчи ҳамда бирлаштирувчи кўприк» ҳисобланади.
Юмалоқ дизайн Гедиминас номидаги Вильнюс техника университетининг Ижод ва инновацияси маркази муҳандислари томонидан яратилган бўлиб, вақт ғилдирагининг рамзи ҳисобланади. Ташкилотчиларнинг сўзларига кўра, келажакда порталларни бошқа шаҳарларда ҳам қуриш режалаштирилмоқда.
Изоҳ (0)