Farg‘ona viloyatining Farg‘ona tumani Vodil hududlarida 29-may kuni kuchli shamol va chang bo‘ronlari kuzatildi. Bu haqda ijtimoiy tarmoqlarda videoxabarlar qoldirilgan.
“Havoda namlikning o‘ta pastligi va Farg‘ona viloyati janubidagi tog‘liklar hamda tekislik o‘rtasidagi bosimda yuqori farqlar kuzatilgani uchun bu hududda mahalliy shamollar chang bo‘ron ko‘rinishida kuzatilmoqda”, — deya vaziyatga sharh berdi Telegram’dagi @uzb_meteo kanali.
Kanal mualliflarining qayd etishicha, “bu quruq chang shamoli qishloq xo‘jaligi mahsulotlari, bog‘dorchilik uchun xavfli hisoblanadi”.
Avvalroq, 26-may kuni Andijon viloyatida ham chang bo‘roni kuzatilgan edi. “O‘zgidromet” mazkur holat yuzasidan bergan izohida hodisa vaqtida shamolning tezligi soniyasiga 16 metrga yetganini, bo‘ron havoda namlik darajasi yetarli bo‘lmagani oqibatida kelib chiqqanini ma’lum qilgan edi.
29-may kuni kechki mahal Toshkent shahrida kuzatilgan chang bo‘roni poytaxt aeroporti ish faoliyatiga qisman ta’sir qilgani haqida avval xabar berilgan edi.
Izoh (0)