Фарғона вилоятининг Фарғона тумани Водил ҳудудларида 29 май куни кучли шамол ва чанг бўронлари кузатилди. Бу ҳақда ижтимоий тармоқларда видеохабарлар қолдирилган.
«Ҳавода намликнинг ўта пастлиги ва Фарғона вилояти жанубидаги тоғликлар ҳамда текислик ўртасидаги босимда юқори фарқлар кузатилгани учун бу ҳудудда маҳаллий шамоллар чанг бўрон кўринишида кузатилмоқда», — дея вазиятга шарҳ берди Telegram’даги @uzb_meteo канали.
Канал муаллифларининг қайд этишича, «бу қуруқ чанг шамоли қишлоқ хўжалиги маҳсулотлари, боғдорчилик учун хавфли ҳисобланади».
Аввалроқ, 26 май куни Андижон вилоятида ҳам чанг бўрони кузатилган эди. «Ўзгидромет» мазкур ҳолат юзасидан берган изоҳида ҳодиса вақтида шамолнинг тезлиги сониясига 16 метрга етганини, бўрон ҳавода намлик даражаси етарли бўлмагани оқибатида келиб чиққанини маълум қилган эди.
29 май куни кечки маҳал Тошкент шаҳрида кузатилган чанг бўрони пойтахт аэропорти иш фаолиятига қисман таъсир қилгани ҳақида аввал хабар берилган эди.
Изоҳ (0)