O‘zbekistondagi 40 foiz ko‘prik va yo‘l o‘tkazgichlar yaroqsiz, qoniqarsiz va ta’mirtalab holatga kelib qolgan – Senat

O‘zbekistonda mavjud ko‘priklarning deyarli yarmi yaroqsiz holatda. Bu haqda Oliy Majlis Senatining yalpi majlisida ma’lum qilindi.

Qayd etilishicha, respublika avtomobil yo‘llarida o‘tkazilgan xatlov natijalariga ko‘ra, bugungi kunda 15 mingga yaqin ko‘prik mavjud bo‘lib, shundan 40 foiz ko‘prik va yo‘l o‘tkazgichlarning ekspluatatsion holati yaroqsiz, qoniqarsiz va ta’mirtalab holatga kelib qolgan.

Bundan tashqari, avtomobil yo‘llarida joylashgan va egasi aniqlanmagan ko‘priklarni saqlovchilarga topshirish ishlari amalga oshirilishi o‘rganilganida 3477 dona ko‘prik o‘z egalariga berilmagani aniqlandi.

“O‘z holiga tashlab qo‘yilgan va yaroqsiz holga kelgan ko‘priklar esa fuqarolarning xavfsiz harakatlanishiga salbiy ta’sir ko‘rsatmoqda, ularning haqli e’tirozlariga sabab bo‘lmoqda”, – deyiladi Senat axborotida.

Bundan avval Toshkentda uchta yo‘l o‘tkazgich va olti polosali yo‘lni qurish 49 mln dollarga qadar qimmatlashgani, Andijondagi “Alvasti ko‘prik” o‘rnida yangi ko‘prik foydalanishga topshirilgani hamda Surxondaryoda internetda yaroqsizligi bilan “mashhurlikka” erishgan va 16,1 mlrd so‘mga tushgan ko‘prik foydalanishga topshirilgani haqida xabar berilgandi.