Chang bo‘roni sabab Buxorodan kelayotgan charter reys Toshkentga qo‘nolmadi

Toshkent shahrida 29-may kuni soat 21:00 atrofida boshlanib, taxminan, bir soatdan ortiq davom etgan kuchli shamol chang bo‘ronlarini keltirib chiqardi. Telegram’dagi @uzb_meteo kanali ma’lumotlariga ko‘ra, 20:51 da shaharda ko‘rinuvchanlik 2 kilometrgacha qisqargan, soniyasiga 14 metr tezlikda shamol esgan. Soat 21:29 ga kelib shamolning tezligi soniyasiga 17 metrgacha kuchaygan.

Shahardagi iqlim sharoiti noqulay bo‘lgani munosabati bilan (“Toshkent osmoni yangiliklari” ma’lumotiga ko‘ra, chang bo‘roni va kuchli shamol sababli) Uzbekistan Airways’ning Buxorodan Airbus A320 neo samolyotida amalga oshirilayotgan HY-9026 charter reysi, ma’lum vaqt kutishdan so‘ng, Toshkentga qo‘na olmay, zaxira aerodromi — Samarqandga yo‘naltirilgan.

Chang bo‘roni Toshkent aeroportining boshqa reyslariga qanchalik ta’sir qilgani haqida hozircha aniq ma’lumot yo‘q.