Buxoroda 19-an’anaviy xalqaro “Ipak va ziravorlar” festivalining ochilish marosimi bo‘lib o‘tdi. Buxoro Arkida bo‘lib o‘tayotgan tadbirda Rossiyaning Ryazan va Komi shaharlaridan, shuningdek, Hindiston, Germaniya va Singapur kabi qator davlatlardan tashrif buyurgan madaniyat va san’at arboblari, xalqaro tashkilotlar va diplomatik korpus vakillari, rasmiy tur-operatorlar qatnashmoqda, deya xabar berdi “Daryo” muxbiri.
Viloyat hamda Buxoro shahar hokimligi, viloyat Turizm va sport masalalarini rivojlantirish boshqarmasi, “Hunarmand” uyushmasi, Madaniyat boshqarmasi hamda boshqa qator tashkilotlar hamkorligidagi festivalda 20 dan ortiq diplomatik vakolatxonalarning 150 nafarga yaqin vakili hamda xorijiy mehmonlar ishtirok etmoqda.
Festivalni Buxoro shahri hokimi Jamol Nosirov tabrik so‘zi bilan ochib bergan va festivalning nufuzi yildan yilga oshib, qamrovi kengayayotganini ta’kidlagan.
Qayd etilishicha, festivalni yoritish uchun Tojikiston, Eron, Fransiya, Turkiya hamda Ozarbayjon davlatlaridan ommaviy axborot vositalari xodimlari kelgan.
“Buxoroyi sharif bizning ham qadriyatlarimizga beshik. Aynan shu festivalda ishtirok etish uchun Buxoroga to‘rtinchi bor kelyapman. Har gal mahobatli va jo‘shqin karvon bilan birga yuraman. Bunday festivallar Turkiya davlatida ham tez-tez o‘tkazib turiladi, ammo ularning ko‘lami bu qadar keng va jozibali emas. Menga tarixiy shahar Buxoroning, nafaqat qadim go‘zalliklari, balki odamlarining ham samimiy va xushchaqchaqligi juda yoqadi”, — deydi Turkiya elchixonasi madaniyat va turizm maslahatchisi Alparslan Akinji “Daryo” muxbiri bilan suhbatda.
Festivalda O‘zbekiston yoshlar ittifoqi Buxoro viloyati kengashi muassisligidagi “Buxoro yoshlari” gazetasining XIX-an’anaviy xalqaro “Ipak va ziravorlar” festivaliga bag‘ishlangan maxsus soni chop etilib, bepul tarqatildi.
Izoh (0)