Internetda “Vodiylik bo‘lganimiz aybimizmi?” sarlavhasi ostida tarqalgan video yuzasidan Toshkent IIBB ma’lumot berdi
Internetda 2021-yil 28-may kuni “Vodiylik bo‘lganimiz aybimizmi?” sarlavhali video tarqalib, unda yo‘l harakati qatnashchilari va Toshkent shahar IIBB xodimlarining kelishmovchiliklari aks etgan. Mazkur holat bo‘yicha IIBB ma’lumot berdi.
Qayd etilishicha, videoga tushirilgan holat 25-may kuni taxminan soat 03:00 da Chilonzor tumani “Erkin” YPX postida ro‘y bergan. Mazkur postda Toshkent shahar IIBB xodimlari poytaxtga kirmoqchi bo‘lgan Chevrolet Tracker rusumli (davlat raqami 60 S 355 RA) avtomobilni to‘xtatgan.
Haydovchi va uch nafar yo‘lovchilar tekshirilib, avtomobil saloni xizmat iti yordamida tekshirilganiga fuqarolar norozilik bildirib, holatni videoga tushirishni boshlashgan. Videoga tushirish davomida ular odob doirasidan chiqib, masofa saqlamasdan va o‘zaro hurmat bilan muloqot qilishdan bosh tortgan.
Xabarda aytilishicha, Toshkentga kirishdagi postlar va blok-postlardagi tekshiruvlar “Qoradori” va “Tig‘” maxsus tadbirlar doirasida o‘tkazilib, ular davomida giyohvandlik moddalar va sovuq hamda jangovar qurollarni aniqlashga qaratilgan.
“Tekshiruvlar mintaqaviy mansublik sababli o‘tkazilishi bilan bog‘liq ayblovlar asossiz bo‘lib, rasmiy resurslarimizda poytaxt avtomobillari ham tekshirilishi haqida ma’lumotlar yetarlidir. Mazkur tadbirlarning boshidan buyon poytaxtda taqiqlangan moddalarning tarqalishining oldi olinib, sovuq qurollar musodara qilinmoqda. Bu kabi tadbirlarni o‘tkazishning muhimligida shubha yo‘q va biz fuqarolardan buni tushunishlarini iltimos qilamiz.
Tekshiruv davomida Toshkent shahar IIBB kinologiya xizmati itining qo‘llanilishi to‘g‘risida bayonnoma tuzilib, xolislar ishtiroki ham ta’minlangan. Tekshiruv haydovchi yoki yo‘lovchilar tomonidan qoidabuzarlikni aniqlamaganligi sababli ularning hujjatlari qaytarib berilgan”, – deyiladi xabarda.
Toshkent shahar IIBB rahbariyati tomonidan yuqoridagi holat bo‘yicha xizmat davomida bodikameraning yoqilgani hamda inspektorlar tomonidan muloqot davomida qonunbuzarlikka yo‘l qo‘yilganini tekshirish maqsadida xizmat tekshiruvi o‘tkazish topshirig‘i berilgan.
Bundan avval Samarqandda haydovchiga xizmat guvohnomasini taqdim etishni istamagan YPX xodimiga xizmat tekshiruvi tayinlangani, Samarqandda YPX xodimidan qochib, unga qarshilik ko‘rsatgan haydovchiga nisbatan ish ochilgani hamda Qoraqalpog‘istonda haydovchiga qo‘l ko‘targan YPX xodimiga nisbatan xizmat tekshiruvi o‘tkazilayotgani haqida xabar berilgandi.
