AQSh va Buyuk Britaniya 28-may kuni Jahon sog‘liqni saqlash tashkilotini (JSST) Xitoyda koronavirusning kelib chiqishi ustida chuqurroq tadqiqotlar olib borishga chaqirdi, deb yozmoqda “Interfaks”.
“JSST koronavirus paydo bo‘lishi bo‘yicha o‘tkazgan tadqiqotlarining birinchi bosqichi yetarli bo‘lmadi va yakunlanmadi. Biz o‘z vaqtida shaffof va dalillarga asoslangan holda mutaxassislar boshchiligidagi tadqiqotning ikkinchi bosqichini boshlashga, shu jumladan, Xitoyda ham tekshirishlar olib borishga chaqiramiz”, — deyiladi Jenevadagi AQSh missiyasi bayonotida.
Jenevada Buyuk Britaniyaning BMTdagi doimiy vakili Saymon Menli AQSh murojaatiga qo‘shildi.
“JSST koronavirus paydo bo‘lishi bo‘yicha o‘tkazgan tadqiqotlarining birinchi bosqichi har doim jarayonning oxiri emas, balki boshi deb hisoblangan. Mutaxassislar bayonotida keltirilganidek, biz o‘z vaqtida, shaffof va dalillarga asoslangan holda mutaxassislar boshchiligidagi tadqiqotning ikkinchi bosqichini boshlashga, shu jumladan, Xitoyda ham tekshirishlar olib borishga chaqiramiz”, — deyiladi Menlining Buyuk Britaniya hukumatining saytida e’lon qilingan bayonnomasida.
JSST 28-may kuni koronavirusning kelib chiqish sababini aniqlashga qaratilgan tekshiruvning ehtimoliy yangi bosqichining boshlanish sanasi hali noma’lumligini bildirdi.
AQSh prezidenti Jo Bayden shu hafta mamlakat razvedka agentliklariga “ikki baravar kuch sarflashlarini” aytib, koronavirusning kelib chiqish manbasini aniqlashga va unga 90 kun ichida xabar berishga ko‘rsatma berdi. Bayden hisobotda qo‘shimcha tekshiruvlarni talab qilishi mumkin bo‘lgan ba’zi tafsilotlarga, shu jumladan, “Xitoy masalasi”ga e’tibor berish kerakligini aytdi.
Avvalroq JSSTning xalqaro mutaxassislar jamoasi Xitoyning Uxan shahrida to‘rt hafta mobaynida koronavirusning paydo bo‘lish sabablarini o‘rgangan edi. Ushbu safar natijalari to‘g‘risidagi hisobot JSST tomonidan 30-mart kuni e’lon qilindi. Hisobotda infeksiyaning kelib chiqishi to‘g‘risida to‘rtta ehtimoliy versiya bayon qilingan. Uxan virusologiya institutiga tashrif buyurgan mutaxassislar natijalar to‘g‘risidagi hisobotda koronavirusning institut laboratoriyasidan tarqatilganining “ehtimoli juda kam” degan xulosaga keldi.
Shuningdek, 19-may kuni AQSh Vakillar palatasi Razvedka qo‘mitasidagi respublikachilar koronavirus laboratoriyada paydo bo‘lgani to‘g‘risida ishonchli dalillar mavjudligini e’lon qildi. Ularning fikriga ko‘ra, COVID-19 epidemiyasi Uxan virusologiya institutidan sizib chiqishi tufayli tarqalgan bo‘lishi mumkin.
O‘z navbatida, Xitoy Tashqi ishlar vazirligining rasmiy vakili Xua Chunyin Jahon sog‘liqni saqlash tashkiloti (JSST) koronavirus infeksiyasining Amerika harbiy laboratoriyalaridan tarqagani ehtimolini o‘rganib chiqishi kerakligini ta’kidladi.
Izoh (0)