АҚШ ва Буюк Британия 28 май куни Жаҳон соғлиқни сақлаш ташкилотини (ЖССТ) Хитойда коронавируснинг келиб чиқиши устида чуқурроқ тадқиқотлар олиб боришга чақирди, деб ёзмоқда «Интерфакс».
«ЖССТ коронавирус пайдо бўлиши бўйича ўтказган тадқиқотларининг биринчи босқичи етарли бўлмади ва якунланмади. Биз ўз вақтида шаффоф ва далилларга асосланган ҳолда мутахассислар бошчилигидаги тадқиқотнинг иккинчи босқичини бошлашга, шу жумладан, Хитойда ҳам текширишлар олиб боришга чақирамиз», — дейилади Женевадаги АҚШ миссияси баёнотида.
Женевада Буюк Британиянинг БМТдаги доимий вакили Саймон Менли АҚШ мурожаатига қўшилди.
«ЖССТ коронавирус пайдо бўлиши бўйича ўтказган тадқиқотларининг биринчи босқичи ҳар доим жараённинг охири эмас, балки боши деб ҳисобланган. Мутахассислар баёнотида келтирилганидек, биз ўз вақтида, шаффоф ва далилларга асосланган ҳолда мутахассислар бошчилигидаги тадқиқотнинг иккинчи босқичини бошлашга, шу жумладан, Хитойда ҳам текширишлар олиб боришга чақирамиз», — дейилади Менлининг Буюк Британия ҳукуматининг сайтида эълон қилинган баённомасида.
ЖССТ 28 май куни коронавируснинг келиб чиқиш сабабини аниқлашга қаратилган текширувнинг эҳтимолий янги босқичининг бошланиш санаси ҳали номаълумлигини билдирди.
АҚШ президенти Жо Байден шу ҳафта мамлакат разведка агентликларига «икки баравар куч сарфлашларини» айтиб, коронавируснинг келиб чиқиш манбасини аниқлашга ва унга 90 кун ичида хабар беришга кўрсатма берди. Байден ҳисоботда қўшимча текширувларни талаб қилиши мумкин бўлган баъзи тафсилотларга, шу жумладан, «Хитой масаласи»га эътибор бериш кераклигини айтди.
Аввалроқ ЖССТнинг халқаро мутахассислар жамоаси Хитойнинг Ухань шаҳрида тўрт ҳафта мобайнида коронавируснинг пайдо бўлиш сабабларини ўрганган эди. Ушбу сафар натижалари тўғрисидаги ҳисобот ЖССТ томонидан 30 март куни эълон қилинди. Ҳисоботда инфекциянинг келиб чиқиши тўғрисида тўртта эҳтимолий версия баён қилинган. Ухань вирусология институтига ташриф буюрган мутахассислар натижалар тўғрисидаги ҳисоботда коронавируснинг институт лабораториясидан тарқатилганининг «эҳтимоли жуда кам» деган хулосага келди.
Шунингдек, 19 май куни АҚШ Вакиллар палатаси Разведка қўмитасидаги республикачилар коронавирус лабораторияда пайдо бўлгани тўғрисида ишончли далиллар мавжудлигини эълон қилди. Уларнинг фикрига кўра, COVID-19 эпидемияси Ухань вирусология институтидан сизиб чиқиши туфайли тарқалган бўлиши мумкин.
Ўз навбатида, Хитой Ташқи ишлар вазирлигининг расмий вакили Хуа Чунйин Жаҳон соғлиқни сақлаш ташкилоти (ЖССТ) коронавирус инфекциясининг Америка ҳарбий лабораторияларидан тарқагани эҳтимолини ўрганиб чиқиши кераклигини таъкидлади.
Изоҳ (0)