Fuqaro aviatsiyasi xalqaro tashkiloti (ICAO) 23-may kuni Afinadan Vilnyusga uchayotgan Irlandiyaning Ryanair aviakompaniyasi samolyotining Minskka majburiy qo‘nishi bo‘yicha tekshiruv o‘tkazadi. Bu haqda Irlandiya transport vaziri Imon Rayanga tayanib, “RBK” xabar berdi.
“Biz ICAO’ning Belarusdagi voqea yuzasidan shaffof va mustaqil tekshiruv o‘tkazish to‘g‘risidagi qarorini to‘liq qo‘llab-quvvatlaymiz va bu masaladagi yordami uchun xalqaro hamkasblarimizga minnatdorchilik bildiramiz”, — dedi Rayan.
U laynerning favqulodda qo‘ndirilishini “Yevropaning aviatsiya xavfsizligiga hujum” deb atab, bu yo‘lovchilar va ekipaj hayotini xavf ostiga qo‘yganini aytdi.
Vazirning so‘zlariga ko‘ra, ICAO’ning oraliq hisoboti 25-iyunda taqdim etilishi kutilmoqda.
Tashkilotning o‘zi ham Ryanair bilan bog‘liq vaziyat bo‘yicha tekshiruv o‘tkazilishini tasdiqladi. ICAO biror davlat tomonidan xalqaro aviatsiya qonunlari, xususan, Chikago konvensiyasi shartlari buzilgan yoki yo‘qligini aniqlamoqchi. ICAO kengashi a’zo davlatlarni va barcha manfaatdor tomonlarni “fuqarolik aviatsiyasi xavfsizligi va muhofazasini ta’minlash manfaatlari yo‘lida” hamkorlik qilishga chaqirdi.
Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qildi. Qo‘nishdan so‘ng reysning ikki yo‘lovchisi — Roman Protasevich va Sofiya Sapega hibsga olindi.
Belarus rasmiylarining ma’lum qilishicha, Ryanair reysi bortida bomba borligi haqida Minsk aeroportiga Falastinning HAMAS harakati nomidan yuborilgan xabar kelib tushgan. HAMAS o‘zining bu xabarga aloqasi yo‘qligini aytdi.
Ryanair samolyotining favqulodda qo‘ndirilishidan so‘ng Yevropa mamlakatlari Belarusdan parvozlarni qabul qilishni rad eta boshladi, Yevropa aviakompaniyalari esa Belarus havo hududini kesib o‘tishdan bosh tortmoqda.
Izoh (0)