Jons Hopkins universiteti ma’lumotlariga ko‘ra, butun dunyoda pandemiya boshidan buyon 168 979 381 kishi koronavirus bilan kasallangan, shularning 3 511 570 nafari vafot etgan. Kasallanish holatlarining ko‘pligi bo‘yicha AQSh (33,2 million), Hindiston (27,5 million), Braziliya (16,3 million), Fransiya (5,6 million) va Turkiya (5,2 million) oldinda bormoqda.
Hindistonda koronavirusning yangi shtammi aniqlandi
Hindistonning G‘arbiy Bengaliya shtatida tibbiyot mutaxassislari koronavirusning shu paytgacha noma’lum bo‘lgan shtammini aniqladi. Uning genomi SARS-CoV-2’ning Britaniya va Janubiy Afrika variantlariga taalluqli bo‘lgan biryo‘la bir nechta asosiy mutatsiyalarni o‘z ichiga oladi.Koronavirusning potensial xavfli variant Kalkuttadagi Xolera va ichak kasalliklarini o‘rganish milliy instituti olimlari tomonidan kashf qilindi. Ta’kidlanishicha, yangi COVID-19 turi Hindiston g‘arbida paydo bo‘lgan.
Mutaxassislar mamlakatning turli hududlarida yashovchi koronavirus aniqlangan ikki mingdan ortiq odamlarning biologik suyuqligi namunalarini tadqiq qilib chiqdi. G‘arbiy Bengaliyadan kelgan namunalarning 16 foizga yaqini COVID-19’ning shu paytgacha noma’lum bo‘lgan shtammi bo‘lib chiqdi.
Olimlar virusning yangi va xavfliroq variatsiyalari endi tobora ko‘proq paydo bo‘la boshlashidan ogohlantirdi.
“Bizning taxminimizcha, bu mutatsiyalar SARS-CoV-2’ning ushbu turini yanada yuqumliroq hamda immunitet uchun sezilarsizroq qilishi kerak. Bu uning G‘arbiy Bengaliya hududi bo‘ylab tarqalishida yordam berishi mumkin… Koronavirusning bu shtammi Hindistondagi epidemiologik vaziyatni yanada murakkablashtirishi mumkin”, — deya qayd etdi tadqiqot mualliflari.
Fransiyada COVID-19’ga qarshi emlanish majburiy bo‘lishi mumkin
Fransiya prezidenti Emmanuel Makron fuqarolarning alohida guruhlari uchun koronavirusga qarshi emlanish majburiy qilib qo‘yilishi mumkinligini aytdi.“Barcha eshiklar ochiq qolmoqda”, — dedi davlat rahbari jurnalistlar majburiy vaksinatsiya borasidagi fikrlarini so‘raganidan keyin.
Bir necha kun avval Fransiya Milliy tibbiyot akademiyasi COVID-19’ga qarshi majburiy vaksinatsiyani joriy qilishni tavsiya etgan edi. Ta’kidlanishicha, birinchi bosqichda u kasallanish bo‘yicha jiddiy xavf ostida bo‘lgan muayyan kasb egalari uchun, undan keyin esa jamoaviy immunitetga erishish yo‘lida mamlakatning butun aholisi uchun zarur bo‘ladi.
Shu bilan birga, o‘tgan yilning 24-noyabrida telemurojaati chog‘ida Makron mamlakat hududida majburiy vaksinatsiya joriy etilmasligiga ishontirgan edi.
Mavzuga doir: Yoqutiston Rossiya hududlari ichida birinchi bo‘lib koronavirusga qarshi majburiy emlashni joriy qildi
Argentinada bir kunda rekord darajada ko‘p odam COVID-19’ni yuqtirib oldi
Argentinada koronavirus bilan kasallanganlar soni bir kecha-kunduzda 41 mingdan ziyodga ko‘paydi, bu pandemiya boshidan buyon mamlakatda kuzatilgan eng yuqori ko‘rsatkich. Shu tariqa jami kasallanganlar soni 3,6 milliondan oshdi.Bir kunda 41 080 kishida COVID-19 aniqlangan, bundan avvalgi rekord 19-mayda qayd etilgan (39 652). Pandemiya boshidan buyon 3 663 215 kishi virusga chalingan. O‘tgan 24 soat ichida kasallikdan 551 kishi vafot etgan, jami o‘lim holatlari soni esa 76 135 taga yetdi.
Argentinada koronavirusga qarshi emlash 2020-yil oxirida boshlangan, mamlakatda Rossiyaning “Sputnik V” vaksinasi ma’qullangan.
Mavzuga doir: Argentinada koronavirus sabab futbol musobaqalari to‘xtatildi. Yozda u yerda Kopa Amerika—2021 bo‘lib o‘tadi
- Parijda 29-may kuni mashhur Indochine guruhi ishtirokida maxsus “sinov konserti” bo‘lib o‘tadi. Undan maqsad shunday ommaviy tadbirlar o‘tkazilganda koronavirus bilan kasallanish xavfi oshish-oshmasligini aniqlash. Konsertda besh ming nafar ko‘ngilli ishtirok etadi, ular manfiy natijali testni taqdim etishi hamda shou vaqtida niqob taqishi kerak bo‘ladi.
- Germaniyada iyundan 12—16 yoshli bolalar uchun koronavirusga qarshi emlanish uchun ro‘yxatdan o‘tish boshlanadi. Yoz oxiriga kelib esa mamlakatning emlanish istagidagi barcha fuqarolari vaksina olish imkoniyatiga ega bo‘ladi.
- Kasallanish sur’atlarining pasayishi fonida Kipr hukumati epidemiologik cheklovlarni yumshatishga qaror qildi. Xususan, 10-maydan komendantlik soati bekor qilinadi. 26-may kuni Kiprda bor-yo‘g‘i 69 kishi COVID-19’ga chalingan.
Izoh (0)