Polshada bo‘lib turgan Nexta Telegram kanalining asoschi va mualliflaridan biri Stepan Putilo mamlakat hukumatidan o‘zi hamda kanalning boshqa xodimlarini himoya qilish uchun qo‘riqlash tizimini yanada kuchaytirishni so‘radi. Bu haqda “Korrespondent.net” xabar bergan.
Putilo loyiha tahririyatiga turli tahdidlar kelib tushayotgani va xodimlar tahlikaga tushib, qo‘rqayotgani haqida gapirgan.
“Biz o‘z hayotimiz va sog‘lig‘imizdan xavotirdamiz”, – degan Putilo.
Avvalroq Minskda samolyotni favqulodda qo‘ndirgan holda hibsga olingan Nexta sobiq bosh muharriri Roman Protasevichning onasi o‘g‘lining Belarusda ommaviy noroziliklar o‘tkazishga hech kimni da’vat etmagani, faqat mamlakatda sodir bo‘lgan voqealarni kanal orqali yoritganini qayd etgandi.
Shuningdek, Belarus kuchishlatar tizimlari e’lon qilgan videoga ko‘ra qo‘lgan olingan Protasevichga jismoniy kuch ishlatish, uni tegishli ko‘rsatmalar berishga majburlash holatlari kuzatilayotgani taxmin qilingan.
Belarus prezidenti Aleksandr Lukashenko samolyotning favqulodda qo‘ndirilganiga izoh bergan va Protasevichni “qonli isyon” tayyorlashga urinishda ayblagan. AQSh, Buyuk Britaniya hukumatlari Belarusni Roman Protasevichni zudlik bilan ozod qilishga chaqirgan. Ko‘plab xalqaro aviakompaniyalar mazkur harakat sabab Minskdan uchib o‘tishni, bu yerga qo‘nishni amalga oshirishni cheklab qo‘ygan.
Izoh (0)