AQSh razvedkasi COVID-19 kelib chiqishi to‘g‘risidagi hali tadqiq qilinmagan ma’lumotlarga ega, u bu haqda Oq uyni xabardor qilgan. The New York Times (NYT) AQSh ma’muriyatining ismi oshkor qilinmagan yuqori lavozimli vakillariga tayanib, shunday xabar berdi.
Gazetaning yozishicha, razvedka xodimlari ushbu ma’lumotlarni o‘rganish uchun “ulkan” kompyuter quvvatidan foydalanmoqchi. Gap COVID-19 izlari topilgan Xitoyning Uxan shahridagi laboratoriya ishchilarining harakatlanishlari va koronavirus epidemiyasining boshlanish xususiyatini o‘rganish haqida ketmoqda.
AQSh ma’muriyati vakili ta’kidlashicha, koronavirus kelib chiqishi bo‘yicha tekshiruv hali oxiri berk ko‘chaga kirmagan.
Gazetaning yozishicha, Oq uy, shuningdek, AQSh ittifoqchilarining laboratoriya va uning faoliyati to‘g‘risida ko‘proq ma’lumot olish uchun o‘z razvedka tarmoqlarini ulashini kutmoqda.
“Yangi tekshiruv ilgari bevosita razvedka faoliyatida qatnashmagan milliy laboratoriyalar va federal hukumatning boshqa ilmiy manbalariga ham murojaat qiladi”, — dedi ma’muriyat vakili.
NYT qayd etishicha, AQSh prezidenti Jo Bayden 26-may kuni yozma bayonot berib, AQSh razvedkasi COVID-19 tarqalishi qanday boshlangan, virus odamlarga kasallangan hayvon bilan aloqada bo‘lish orqali yuqqanmi yoki Xitoy laboratoriyalaridan sizib chiqqanmi, degan savollarga javob berish uchun yetarli ma’lumotga ega emasligini aytib o‘tdi.
Shu munosabat bilan davlat rahbari 90 kun ichida barcha mavjud ma’lumotlarni o‘rganish va ushbu mavzu bo‘yicha yangi hisobot tayyorlash uchun maxsus xizmatlarga “kuchlarini ikki baravar oshirishni” buyurdi.
O‘z navbatida, 19-may kuni AQSh Vakillar palatasi Razvedka qo‘mitasidagi respublikachilar koronavirus laboratoriyada paydo bo‘lgani to‘g‘risida ishonchli dalillar mavjudligini e’lon qildi. Ularning fikriga ko‘ra, COVID-19 epidemiyasi Uxan virusologiya institutidan sizib chiqishi tufayli tarqalgan bo‘lishi mumkin.
Ushbu bayonot ortidan AQShdagi Xitoy elchixonasi Vashingtonning koronavirus “laboratoriyadan tarqalgani” to‘g‘risidagi ayblovlarini tanqid qildi.
“Yaqinda ayrim kishilar koronavirus kelib chiqishi to‘g‘risida diqqatni o‘zlariga qaratish uchun eski siyosiy hiyla-nayrang qo‘llashga harakat qildi. Tuhmat va aybni birovga ag‘darish bilan koronavirusning laboratoriyadan sizib chiqqani haqidagi fitna nazariyasi qayta jonlanmoqda”, — deyiladi diplomatik vakolatxona xabarida.
Xitoy diplomatlarining ta’kidlashicha, ba’zi siyosiy kuchlar pandemiya boshlanganidan beri boshqalarni manipulyatsiya qilishga va ayblashga urinib keladi, shu bilan birga, o‘z xalqining koronavirusga qarshi kurash va xalqaro hamkorlikdagi ehtiyojlarini inobatga olmaydi.
Eslatib o‘tamiz, yanvar—fevral oylarida xalqaro ekspertlar missiyasi Xitoyning Uxan shahrida COVID-19 patogenining kelib chiqishini o‘rganib chiqdi. Ushbu safar natijalari to‘g‘risidagi hisobot JSST tomonidan 30-mart kuni e’lon qilindi. Hisobotda infeksiyaning kelib chiqishi to‘g‘risida to‘rtta ehtimoliy versiya bayon qilingan.
Izoh (0)