Фуқаро авиацияси халқаро ташкилоти (ICAO) 23 май куни Афинадан Вильнюсга учаётган Ирландиянинг Ryanair авиакомпанияси самолётининг Минскка мажбурий қўниши бўйича текширув ўтказади. Бу ҳақда Ирландия транспорт вазири Имон Райанга таяниб, «РБК» хабар берди.
«Биз ICAO’нинг Беларусдаги воқеа юзасидан шаффоф ва мустақил текширув ўтказиш тўғрисидаги қарорини тўлиқ қўллаб-қувватлаймиз ва бу масаладаги ёрдами учун халқаро ҳамкасбларимизга миннатдорчилик билдирамиз», — деди Райан.
У лайнернинг фавқулодда қўндирилишини «Европанинг авиация хавфсизлигига ҳужум» деб атаб, бу йўловчилар ва экипаж ҳаётини хавф остига қўйганини айтди.
Вазирнинг сўзларига кўра, ICAO’нинг оралиқ ҳисоботи 25 июнда тақдим этилиши кутилмоқда.
Ташкилотнинг ўзи ҳам Ryanair билан боғлиқ вазият бўйича текширув ўтказилишини тасдиқлади. ICAO бирор давлат томонидан халқаро авиация қонунлари, хусусан, Чикаго конвенцияси шартлари бузилган ёки йўқлигини аниқламоқчи. ICAO кенгаши аъзо давлатларни ва барча манфаатдор томонларни «фуқаролик авиацияси хавфсизлиги ва муҳофазасини таъминлаш манфаатлари йўлида» ҳамкорлик қилишга чақирди.
Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилди. Қўнишдан сўнг рейснинг икки йўловчиси — Роман Протасевич ва София Сапега ҳибсга олинди.
Беларусь расмийларининг маълум қилишича, Ryanair рейси бортида бомба борлиги ҳақида Минск аэропортига Фаластиннинг ҲАМАС ҳаракати номидан юборилган хабар келиб тушган. ҲАМАС ўзининг бу хабарга алоқаси йўқлигини айтди.
Ryanair самолётининг фавқулодда қўндирилишидан сўнг Европа мамлакатлари Беларусдан парвозларни қабул қилишни рад эта бошлади, Европа авиакомпаниялари эса Беларусь ҳаво ҳудудини кесиб ўтишдан бош тортмоқда.
Изоҳ (0)