Коррупцияга қарши курашиш агентлиги директори Акмал Бурҳонов 26 май куни АОКАда бўлиб ўтган анжуманда «Трест-12» қурилиш компанияси ҳамда қурилиш вазири Ботир Зокиров ўртасидаги манфаатлар тўқнашувига оид вазиятни тасдиқлади, деб ёзади «Gazeta.uz».
«Албатта, биз ‘Трест-12’ бўйича ўрганишлар ўтказяпмиз. Дастлабки ўрганишларимиз бўйича кўрдикки, адашмасам, 5 триллион сўмга яқин (Марказий банкнинг 27 майдаги курсига кўра, 471 миллион доллар атрофида) тўғридан-тўғри шартномалар билан қурилиш ишлари амалга оширилган. Бу ерда ҳам, афсуски, аксарият манфаатлар тўқнашувига йўл қўйилгани ва (қонунчиликда манфаатлар тўқнашуви учун — таҳр.) жавобгарлик масаласининг йўқлиги турибди», — деди у.
«Умуман, биз ўрганганимизда нафақат ‘Трест-12’, балки 2020 йил давомидаги давлат харидларининг 48 фоизи тўғридан-тўғри шартномалар орқали амалга оширилган. Яъни у ёки бу алоҳида фармойиш ёки қарор асосида», — деди Акмал Бурҳонов.
У, шунингдек, давлат харидларида манфаатлар тўқнашувига оид муаммоларни бартараф этиш учун қандай чоралар кўрилаётганига ҳам тўхталиб ўтган.
«Шунинг учун бу бўйича ҳам таклиф тайёрлаяпмиз. Биринчи ўринда, давлат харидларидаги манфаатлар тўқнашуви. Иккинчиси, турли хил фармойишлар ва баённомалар билан давлат харидларини амалга ошириш ва қурилиш объектларини тендерсиз беришни тақиқлашга оид қонунчиликка ўзгартириш киритиш бўйича таклиф тайёрлаяпмиз», — дейди агентлик раҳбари.
Унинг қўшимча қилишича, «Трест-12» қўлга киритган давлат харидларига Қурилиш вазирлигининг алоқаси бор.
«‘Трест-12’ масаласи ҳали ўрганиш жараёнида, натижаси бўйича агар қонун бузилиш ҳолатлари бўладиган бўлса, маълумотларни тақдим этамиз. Айтганимдек, бу ерда катта сумма. Манфаатлар тўқнашуви бор, буни яшириб бўлмайди. Чунки Қурилиш вазирлигининг алоқаси бор. Лекин бу ерда жиноят аломатлари ҳақида гап кетяпти», — дейди Акмал Бурҳонов.
Эслатиб ўтамиз, 13 апрель куни акциядорлари орасида қурилиш вазири Ботир Зокировнинг ўғли ва рафиқаси бўлган «Трест-12» компанияси тендерсиз қатор лойиҳаларни амалга ошириб келаётгани тўғрисида хабар берилганди. Компания акциядорлари рўйхатида 2019 йил июль ойида вазирнинг ўзи ҳам бўлган. Ўшанда у қурилиш вазирининг биринчи ўринбосари, 1996−2011 йилларда эса — «Трест-12» бошқарув кенгаши раиси сифатида ишлаган.
Вазир Тошкентнинг Шароф Рашидов кўчасидаги (Мустақиллик майдони ёнида) маъмурий бино реконструкциясига оид давлат харидига ўзи ва оила аъзоларининг алоқаси йўқлигини айтган эди. «Бир нарсани тушунишларинг керак, 51 фоиз давлат улуши бўлгандан кейин менга унинг совуғи ҳам, иссиғи ҳам йўқ», — деганди вазир.
Кейинроқ мазкур компания ҳукумат буйруғи билан Қонунчилик палатаси биносининг ташқи кўринишини реконструкция қилиш ва бинони жорий таъмирлаш учун 16,54 миллиард сўмлик лойиҳани қўлга киритгани маълум бўлганди.
Мавзуга доир:
- Коррупцияга қарши курашиш агентлиги Бухоро тиббиёт институти томонидан давлат харидлари борасида қонун бузилишига йўл қўйилганини тасдиқлади
- Термизда қуриладиган 20 млн долларлик халқаро савдо марказининг тендерида ака-укага тегишли компаниялар қатнашгани маълум бўлди
- Коррупцияга қарши курашиш агентлигига суд ва прокуратура қарорларидан норози аҳоли кўпроқ мурожаат қилаётгани маълум бўлди
Изоҳ (0)