Toshkent viloyati hokimligi huzuridagi Obodonlashtirish bosh boshqarmasi O‘rta Chirchiq tumani obodonlashtirish boshqarmasi boshlig‘iga tegishli ekanligi aytilayotgan audioyozuv bo‘yicha tekshiruv boshladi.
Ijtimoiy tarmoqlarda Toshkent viloyati O‘rta Chirchiq tumani obodonlashtirish boshqarmasi boshlig‘i Asqar Turdiqulovning xodim bilan muloqoti yozilgan audioyozuv tarqaldi. Unda xodim boshqarma boshlig‘ini majburiy mehnatga jalb qilganlikda ayblagan. Asqar Turdiqulov esa o‘z navbatida xodimni qo‘pol so‘zlar bilan haqorat qilgan.
“Ayni paytda ushbu rahbar xodimning o‘z mansabiga loyiqligi masalasi muhokama qilinmoqda”, — deyiladi viloyat bosh boshqarmasi xabarda.
Shuningdek, Toshkent viloyati hokimligi huzuridagi Obodonlashtirish bosh boshqarmasi munosabatida har qanday darajadagi rahbarning birovni haqoratlashga haqqi yo‘qligi, bu kabi hollarda fuqarolar o‘z huquqlarini himoya qilishi lozimligi ta’kidlanadi.
“Bunaqa holatlarda fuqarolarimiz tegishli tashkilotlarga murojaat qilib, o‘z huquqlarini himoya qilishlari tarafdorimiz va kasbiga noloyiq xodimlarga oramizda o‘rin yo‘qligini bildiramiz”, — deyiladi munosabatda.
Avvalroq Shahrisabzda tibbiyot xodimlari majburiy mehnatga jalb qilingani haqida xabar berilgani, biroq bosh shifokor buni rad etgani, shuningdek, Qashqadaryo va Andijonda tibbiyot xodimlari va o‘qituvchilarni majburiy mehnatga jalb qilgan mansabdorlar 12,2 mln so‘m jarimaga tortilgani to‘g‘risida xabar berilgandi.
Izoh (0)