Тошкент вилояти ҳокимлиги ҳузуридаги Ободонлаштириш бош бошқармаси Ўрта Чирчиқ тумани ободонлаштириш бошқармаси бошлиғига тегишли эканлиги айтилаётган аудиоёзув бўйича текширув бошлади.
Ижтимоий тармоқларда Тошкент вилояти Ўрта Чирчиқ тумани ободонлаштириш бошқармаси бошлиғи Асқар Турдиқуловнинг ходим билан мулоқоти ёзилган аудиоёзув тарқалди. Унда ходим бошқарма бошлиғини мажбурий меҳнатга жалб қилганликда айблаган. Асқар Турдиқулов эса ўз навбатида ходимни қўпол сўзлар билан ҳақорат қилган.
«Айни пайтда ушбу раҳбар ходимнинг ўз мансабига лойиқлиги масаласи муҳокама қилинмоқда», — дейилади вилоят бош бошқармаси хабарда.
Шунингдек, Тошкент вилояти ҳокимлиги ҳузуридаги Ободонлаштириш бош бошқармаси муносабатида ҳар қандай даражадаги раҳбарнинг бировни ҳақоратлашга ҳаққи йўқлиги, бу каби ҳолларда фуқаролар ўз ҳуқуқларини ҳимоя қилиши лозимлиги таъкидланади.
«Бунақа ҳолатларда фуқароларимиз тегишли ташкилотларга мурожаат қилиб, ўз ҳуқуқларини ҳимоя қилишлари тарафдоримиз ва касбига нолойиқ ходимларга орамизда ўрин йўқлигини билдирамиз», — дейилади муносабатда.
Аввалроқ Шаҳрисабзда тиббиёт ходимлари мажбурий меҳнатга жалб қилингани ҳақида хабар берилгани, бироқ бош шифокор буни рад этгани, шунингдек, Қашқадарё ва Андижонда тиббиёт ходимлари ва ўқитувчиларни мажбурий меҳнатга жалб қилган мансабдорлар 12,2 млн сўм жаримага тортилгани тўғрисида хабар берилганди.
Изоҳ (0)