2021-yil oxiriga qadar O‘zbekiston Prezidenti Shavkat Mirziyoyevning Bryusselga tashrifi kutilmoqda. Tashrif doirasida har tomonlama sheriklik va hamkorlik bo‘yicha yangi shartnomalarni imzolash rejalashtirilgan. Bu haqda Yevropa Ittifoqining Markaziy Osiyo bo‘yicha maxsus vakili Piter Burianga tayanib, “Gazeta.uz” xabar berdi.
Kengaytirilgan sheriklik va hamkorlik borasidagi bitim 1999-yildan buyon amalda bo‘lgan sheriklik va hamkorlik bitimning o‘rinini egallaydi. Avvalroq Tashqi ishlar vazirligi Yevropa Ittifoqi va O‘zbekiston kengaytirilgan sheriklik va hamkorlik to‘g‘risida bitimni 2020-yilda imzolash niyatida bo‘lganini, biroq koronavirus pandemiyasi sabab vaziyat biroz o‘zgarganini ma’lum qilgandi.
“Ushbu bitimning deyarli asosiy yo‘nalishlari bo‘yicha ishlar yakunlanib qolgan. Biz mazkur jarayonni yil oxiriga qadar yakunlashga tayyormiz. Bu Prezident Mirziyoyevning Bryusselga tashrifi uchun yaxshi sabab bo‘ladi deya hisoblaymiz”, — deydi Piter Burian.
Maxsus vakilning ta’kidlashicha, O‘zbekiston Prezidentining tashrifi “katta intiqlik bilan” kutilmoqda. “Chunki bu ikkala tomon ham hamkorlikni rivojlantirish masalalariga juda jiddiy yondashayotgani borasida muhim signaldir”, — deydi elchi.
Diplomatning qo‘shimcha qilishicha, O‘zbekistondagi islohotlar jarayoni YI va Toshkent o‘rtasidagi hamkorlikni sezilarli darajada oshirishga xizmat qiladi. “Biz ushbu bitimda barcha eng ilg‘or tajriba va sohalarni ifoda etishga urinyapmiz”, — deydi Piter Burian.
Izoh (0)