Oliy Majlis Senati Kengashi 25-may kuni bo‘lib o‘tgan yig‘ilishda Sardoba suv to‘g‘onining yorilishi oqibatida Sirdaryo viloyatidagi tadbirkorlarga yetkazilgan zarar uchun kompensatsiyani respublika budjetidan bosqichma-bosqich ajratishni ma’qulladi, deb xabar beradi “Gazeta.uz”.
Aprel oyida hukumat komissiyasi baliqchilik, chorvachilik va parrandachilikka ixtisoslashgan korxonalarga yetkazilgan zararni qoplash hamda sug‘orish va drenaj tarmoqlarini qurish, ta‘mirlash uchun zarur bo‘lgan mablag‘larni hisoblab chiqqandi. Ushbu mablag‘lar 126 milliard so‘mni tashkil etgan.
Ta’kidlanishicha, texnogen ofatdan jabr ko‘rgan Sardoba, Oqoltin va Mirzaobod tumanlari aholisiga zaruriy yordam ko‘rsatilgan.
“Shuningdek, Senat a’zolari tadbirkorlik subyektlari, fuqarolarning murojaatlari asosida vaziyatni o‘rganish maqsadida hodisa joyiga chiqqan. Ushbu masala Oliy Majlis Senatining doimiy nazoratiga olingan”, — deyiladi xabarda.
Eslatib o‘tamiz, 2020-yil 1-may kuni Sirdaryo viloyatidagi Sardoba suv ombori to‘g‘onining yemirilishi natijasida suv toshqini yuz bergan, oqibatda bir qancha aholi punktlari, bino-inshootlar hamda ekin maydonlari jiddiy talafot ko‘rgan. Sardoba suv omborining hozirgi holati va yuzaga kelgan texnogen ofatning sabablarini o‘rganish uchun Moskva davlat qurilish universiteti mutaxassislari jalb qilingandi. Qurilish vaziri Botir Zokirov 1-mart kuni Moskvadan kelgan ushbu mutaxassislarga 124 ming dollar to‘lanishi belgilanganini aytgandi.
Mavzuga doir:
- FVV vakili Sardoba suv omborida yuz bergan falokatning asosiy sabablarini sanab o‘tdi
- Sardoba toshqinidan talafot ko‘rgan uchta bog‘cha 7,6 mlrd so‘mga rekonstruksiya qilinib, ishga tushirildi
- Sardoba suv omborini qurish uchun ajratilgan budjet mablag‘larining qanchalik qonuniy sarflangani yuzasidan tergov davom etmoqda
Izoh (0)