Олий Мажлис Сенати Кенгаши 25 май куни бўлиб ўтган йиғилишда Сардоба сув тўғонининг ёрилиши оқибатида Сирдарё вилоятидаги тадбиркорларга етказилган зарар учун компенсацияни республика бюджетидан босқичма-босқич ажратишни маъқуллади, деб хабар беради «Gazeta.uz».
Апрель ойида ҳукумат комиссияси балиқчилик, чорвачилик ва паррандачиликка ихтисослашган корхоналарга етказилган зарарни қоплаш ҳамда суғориш ва дренаж тармоқларини қуриш, таъмирлаш учун зарур бўлган маблағларни ҳисоблаб чиққанди. Ушбу маблағлар 126 миллиард сўмни ташкил этган.
Таъкидланишича, техноген офатдан жабр кўрган Сардоба, Оқолтин ва Мирзаобод туманлари аҳолисига зарурий ёрдам кўрсатилган.
«Шунингдек, Сенат аъзолари тадбиркорлик субъектлари, фуқароларнинг мурожаатлари асосида вазиятни ўрганиш мақсадида ҳодиса жойига чиққан. Ушбу масала Олий Мажлис Сенатининг доимий назоратига олинган», — дейилади хабарда.
Эслатиб ўтамиз, 2020 йил 1 май куни Сирдарё вилоятидаги Сардоба сув омбори тўғонининг емирилиши натижасида сув тошқини юз берган, оқибатда бир қанча аҳоли пунктлари, бино-иншоотлар ҳамда экин майдонлари жиддий талафот кўрган. Сардоба сув омборининг ҳозирги ҳолати ва юзага келган техноген офатнинг сабабларини ўрганиш учун Москва давлат қурилиш университети мутахассислари жалб қилинганди. Қурилиш вазири Ботир Зокиров 1 март куни Москвадан келган ушбу мутахассисларга 124 минг доллар тўланиши белгиланганини айтганди.
Мавзуга доир:
- ФВВ вакили Сардоба сув омборида юз берган фалокатнинг асосий сабабларини санаб ўтди
- Сардоба тошқинидан талафот кўрган учта боғча 7,6 млрд сўмга реконструкция қилиниб, ишга туширилди
- Сардоба сув омборини қуриш учун ажратилган бюджет маблағларининг қанчалик қонуний сарфлангани юзасидан тергов давом этмоқда
Изоҳ (0)