Ijtimoiy tarmoqlarda Samarqand viloyati hamda Toshkent shahridagi Mehribonlik uyi tarbiyalanuvchilarining uy-joy masalasidagi muammolari sababli 22-may kuni ichki ishlar organi xodimlari tomonidan Yunusobod tumani IIO FMB binosiga olib ketilgani va ularga nisbatan kuch ishlatib, tan jarohati yetkazgani haqidagi video tarqaldi. Mazkur holat Oliy Majlis Senatining Yoshlar, madaniyat va sport masalalari qo‘mitasi mazkur holatning nazoratga olinganini ma’lum qilindi.
Ta’kidlanishicha, Samarqand viloyatidagi 6, 10-sonli hamda Toshkent shahridagi 22-sonli Mehribonlik uyi tarbiyalanuvchilari uchun davlat tomonidan bepul ravishda uy-joy ajratilgan, biroq tarbiyalanuvchilar mutasaddi tashkilotlar tomonidan ushbu uy-joylar ularga kredit asosida berilgani to‘g‘risida ogohlantirmagan va buning oqibatida ular mazkur turar joylardan haydab chiqarilgan.
Ushbu masalaga yechim izlab Toshkent shahriga kelishganida esa ichki ishlar xodimi tomonidan ularga nisbatan o‘rinsiz harakatlar, ya’ni jismoniy kuch ishlatish holati kuzatilgan.
Toshkent shahar IIBB matbuot xizmati ham ushbu holatga rasmiy munosabat bildirib, mazkur videodagi tasvirlar Toshkent shahar IIBB rahbariyati tomonidan nazoratga olingani va ushbu ish yuzasidan xizmat tekshiruvi o‘tkazilayotganini ma’lum qildi.
Avvalroq Samarqanddagi maktab-internatning tarbiyalanuvchilari kaltaklangani aytilgan xabar tarqalgandi. Mazkur holat Senatning Fan, ta’lim va sog‘liqni saqlash masalalari qo‘mitasi tomonidan nazoratga olingan. Tegishli idoralarga ushbu masala qonuniy ko‘rib chiqilishi yuzasidan ko‘rsatmalar berilgan.
Izoh (0)