Qirg‘iziston parlamenti chegaradagi vakolatli fuqarolarga qurol berishni taklif qilmoqda

Qirg‘iziston parlamentida 2015-yilda qabul qilingan “Chegaradagi vakolatli shaxslar to‘g‘risida”gi qonunga o‘zgartirish kiritish loyihasi jamoatchilik muhokamasiga qo‘yildi. Bu haqda Kloop xabar berdi.

Xabarga ko‘ra, bir qator deputatlar qonunga o‘zgartirish kiritishni taklif qilmoqda. Unga ko‘ra, davlat chegaralarini himoya qilish organi fuqarolarga o‘qotar va harbiy qurollarni berishi mumkin bo‘ladi. Hozirgi kunda chegaralarni himoya qilish bilan Milliy xavfsizlik davlat qo‘mitasi shug‘ullanadi.

Shu bilan birga, faqat chegara vakili maqomiga ega bo‘lgan fuqarolargina qurol olishi mumkinligi ta’kidlangan. Amaldagi qonunchilikka ko‘ra, fuqarolar bunday maqomni davlat chegarasini qo‘riqlash sohasidagi organning qarori bilan olishi mumkin.

Shuningdek, qonunga binoan ushbu maqom chegaraoldi hududlarida doimiy yashaydigan va mehnat shartnomasi asosida ishlaydigan fuqarolarga beriladi. Qurol-yarog‘ masalasidagi o‘zgarishlar bilan birgalikda qonun loyihasida chegara xizmatchilari tomonidan qurol olib yurish va ulardan foydalanish uchun to‘lovlar va mashg‘ulotlar nazarda tutilgan.

Amaldagi qonunda chegaradagi vakolatli fuqarolar uchun harbiy qurol berilishi nazarda tutilmagan. Qonunga ko‘ra, fuqarolar davlat chegaralarini qo‘riqlashda chegarachilarga yordam berish uchun jalb qilinadi.

Chegara muammosi Qirg‘izistonda bir necha yildan beri dolzarb bo‘lib kelmoqda. Chegaradagi bahsli va tavsiflanmagan hududlar tufayli Qirg‘iziston va boshqa davlatlar aholisi o‘rtasida to‘qnashuvlar bo‘lib turadi.

So‘nggi marta aprel oyi oxirida Qirg‘iziston va Tojikistonning chegaraoldi viloyatlari aholisi o‘rtasidagi ziddiyat ikki mamlakat harbiylarining qurolli to‘qnashuviga aylanib ketgandi. Qirg‘iz-tojik chegarasidagi nizolarda Qirg‘izistonning 36 fuqarosi halok bo‘ldi, 200 ga yaqin kishi jarohat oldi. Tojikiston esa 19 kishi halok bo‘lgani, 87 kishi jabrlangani haqida xabar berdi. Mojaroda 300 dan ortiq uylar va infratuzilma obyektlari vayron qilingan, ayrimlari yonib ketgan. 29-aprel oqshomida tomonlar nizoni to‘xtatish va chegaradan harbiy kuchlarni olib ketish to‘g‘risida kelishib oldi, ammo ertasi kuni yana otishma boshlandi. 30-aprel kuni tushdan keyin navbatdagi sulhga erishildi. 3-may kuni Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi.