Jons Hopkins universiteti ma’lumotlariga qaraganda, dunyo bo‘yicha 167 849 492 kishi COVID-19’ni yuqtirib olgan, shularning 3 485 810 nafari esa vafot etgan. Kasallanish holatlarining ko‘pligi bo‘yicha doimgidek AQSh (33,1 million), Hindiston (27,1 million), Braziliya (16,1 million), Fransiya (5,6 million) va Turkiya (5,2 million) yetakchilik qilmoqda.
Braziliyada koronavirusning yangi shtammi aniqlandi
Braziliyada koronavirusning yangi shtammi aniqlandi. Uning kelib chiqishi hozircha noma’lum. Infeksiyaning yangi turi birinchi marta San-Paulu shtatidagi Itirapina shahrida namunalardan birida aniqlangan edi, u Portu-Ferreyra shahrida ham tarqalgan.Yangi shtammning qanchalik darajada yuqumli va xavfliligi hozircha ma’lum emas.
COVID-19’ning yangi variantiga P.4 deb nom berildi. U Manaus shahrida aniqlangan P.1 shtammiga qarindosh hisoblanadi. U esa Rio-de-Janeyroda tarqalgan P.2 kabi Braziliyaning B.1.1.28 shtammidan kelib chiqqan.
Mavzuga doir: Braziliya koronavirusning “ideal laboratoriyasi” deb ataldi. Mamlakatda yangi va xavfliroq shtammlar paydo bo‘lmoqda
Gonkongda millionlab doza vaksina tashlab yuboriladi
Gonkong hukumati koronavirusga qarshi vaksinaning ulkan zaxirasini tashlab yuborishi mumkin. Hukumatning vaksinalar bo‘yicha maqsadli guruhi vakili Tomas Chjanning aytishicha, ishlatilmay qolgan millionlab vaksinalarning yaroqlilik muddati tugamoqda, odamlar esa emlanishni xohlamayapti. Pfizer/BioNTech vaksinasi birinchi partiyasining yaroqlilik muddati tugashiga bor-yo‘g‘i uch oy vaqt qoldi, deya ogohlantirdi u.“Barcha vaksinalar yaroqlilik muddatiga ega. Bu muddat o‘tganidan keyin ulardan foydalanish mumkin emas, BioNTech uchun jamoat vaksinatsiya markazlari esa, joriy rejalarga ko‘ra, sentabrdan keyin ishlashdan to‘xtaydi”, — dedi Chjan.
Qolgan butun dunyo vaksinalar uchun kurashayotgan bir paytda Gonkongda ulkan vaksina zaxirasi bo‘lishi noto‘g‘ri, dedi u va yangi dozalar yil oxirigacha yetkazib berilishi amri maholligini qo‘shib qo‘ydi.
Gonkong Pfizer/BioNTech va Sinovac (Xitoy) vaksinalaridan 7,5 million dozadan sotib olgan edi, ammo ayni vaqtgacha maxsus ma’muriy tuman aholisining 19 foizigina bitta dozada emlangan, ikkita dozani aholining 14 foizi olgan. Gonkonglik shifokorlar ham emlanishdan bosh tortmoqda. Ma’lum bo‘lishicha, tuman shifoxonalari xodimlarining uchdan bir qismigina vaksinatsiyadan o‘tgan.
Mavzuga doir: Gonkongda koronavirus tarqalishi yana tezlashgani tufayli keskin cheklovlar joriy etildi
Polshada emlanganlar o‘rtasida pul va mashina yutuqlari o‘ynaladi
Polshada Milliy vaksinatsiya dasturi doirasida aholini immunizatsiya qilish sur’atlarini oshirish uchun hukumat lotereya tashkil qildi. COVID-19’ga qarshi emlangan polshaliklar avtomatik tarzda Totalizator Sportowy lotereyasi ishtirokchilariga aylanadi, unda pul yutuqlari va gibrid avtomobillarni qo‘lga kiritish mumkin.Chunonchi, vaksina olgan har 200 minginchi odam 140 dollar miqdorida kafolatlangan mukofotga ega bo‘ladi.
Ayni vaqtda, lotereya ishtirokchilarining har birida yutuq uchun uchta imkoniyat bo‘ladi. Har hafta 14 ming dollar miqdorida mukofot pullari hamda elektr skuterlar, yonilg‘i yoki sug‘urta vaucherlari kabi yutuqlar o‘ynaladi.
Har oy esa 28 ming dollar qiymatida ikkita mukofot va gibrid avtomobil, so‘nggi ikkita lotereyada esa ikki marta 280 ming dollardan hamda gibrid avtomobil yutuqqa qo‘yiladi.
Shuningdek:- Jahon sog‘liqni saqlash tashkiloti (JSST) haftalik hisobotida aytilishicha, koronavirusning “hindcha” shtammi rasman aniqlangan mamlakatlar soni 53 taga yetgan. Norasmiy ma’lumotlarga qaraganda, B.1.617 varianti yana yettita davlatda tarqalgan. Agar bu ma’lumotlar tasdiqlansa, bu shtammlar aniqlangan mamlakatlar soni 60 taga yetadi.
- AQShda 18 yosh va undan katta aholining yarmi COVID-19’ga qarshi to‘liq emlangan. Oq uyning koronavirus bo‘yicha katta maslahatchisi Endi Slavittning ma’lumotlariga ko‘ra, 25 ta shtatda va Vashingtonda (Kolumbiya okrugi) voyaga yetgan aholining kamida 50 foizi to‘liq emlangan bo‘lsa, to‘qqizta shtatda 70 foizi vaksinaning ikkita dozasini olgan.
Izoh (0)