Toshkent shahrida 23-may kuni kuzatilgan yog‘ingarchilik vaqtida teleminoraga chaqmoq urilgani va uning uchidagi bayroq yonib ketgani to‘g‘risida xabar berilgandi. Keyinroq ushbu xabar o‘z tasdig‘ini topmagan. “Radioaloqa, radioeshittirish va televideniye markazi” DUK ijtimoiy tarmoqlarda “chaqmoq urgani” tasvirlangan videoga munosabat bildirdi.
Toshkent shahrida kuzatilgan noqulay ob-havo sharoiti vaqtida Toshkent teleminorasiga to‘g‘ridan to‘g‘ri chaqmoq urish hodisasi sodir bo‘lmagan, ya’ni video olingan rakursdan chaqmoq urgani qayd etilgan bo‘lsa-da, aslida chaqmoq urishi teleminoradan ma’lum bir masofada bo‘lib o‘tgan.Avvalroq Favqulodda vaziyatlar vazirligi matbuot xizmati teleminoraga “haqiqatan ham chaqmoq urilgani”ni, biroq buning oqibatida inshootga shikast yetmaganini, teleminora odatdagi tartibda ishlayotganini ma’lum qilgandi.Toshkent teleminorasining bayrog‘i yongan video ham yolg‘on xabar bo‘lib, teleminora bayrog‘ining past qismidagi ogohlantiruvchi qizil chiroqlar shu’lasi bayroqqa tushib, ushbu holatni aks ettirgan.
Respublikamizning noyob arxitektura inshooti bo‘lmish Toshkent teleminorasi kuchli chaqmoq urishiga qarshi himoya tizimi va yerga ulanish konturlari bilan ta’minlangan bo‘lib, chaqmoq urish xavfidan to‘liq himoyalangan. Bugungi kunda Toshkent teleminorasida barcha texnik qurilmalar barqaror ishlamoqda va aholiga teleradiodasturlar uzluksiz tarqatib kelinmoqda.
“Radioaloqa, radioeshittirish va televideniye markazi” DUK
Izoh (0)