Сурхондарёда 2020 йилда оналар ва болалар ўлими сони ошди. Бу ҳақда 20 май куни Олий Мажлис Сенатининг прокуратура органлари фаолияти устидан назорат қилувчи комиссияси мажлисида маълум қилинди.
Дастлаб «Фуқаролар соғлиғини сақлаш тўғрисида»ги қонун ижроси, шу жумладан, болаларда касалликларни эрта аниқлаш ва профилактика қилиш, болалар тиббий кўригини ва даволаш-соғломлаштириш тадбирларини ўз вақтида амалга ошириш, оналик ва болаликни муҳофаза қилиш борасидаги прокурор назорати ҳолатини Сурхондарё вилоятида ўрганиш натижалари муҳокама қилинган.
Мажлисда иштирок этган «Rost24»нинг ёзишича, маълумотларга кўра, Сурхондарё вилоятида яшовчи қарийб 2,7 миллион нафар аҳолининг 900 минг нафарга яқини ёки 33,2 фоизини вояга етмаганлар, 600 минг нафардан ортиғини туғиш ёшидаги аёллар ташкил этади. 2020 йил давомида жами 35 та (2019 йил 16 та) оналар ўлими қайд этилган бўлиб, 2019 йилнинг шу даврига нисбатан 19 тага кўпайган. Шунингдек, болалар ўлими даражаси 2020 йил давомида 586 тани ташкил қилган бўлса, бу кўрсаткич олдинги йилларга нисбатан камаймаган.
Оналар ўлими Ангор туманида нисбатан юқори бўлиб, 6 нафар, Термиз шаҳар ва Жарқўрғон туманида 4 нафардан ва болалар ўлими даражаси Узун туманида 6 (13), Термиз шаҳрида 49 (160) нафарни ташкил этиб, 2019 йилга нисбатан Узун туманида 2 баравар, Термиз шаҳрида 3 баравар ошганлиги аниқланган.
Болалар ўлими касалликлар бўйича таҳлили, 259 нафари перинатал даври касалликларидан, 183 нафари нафас олиш органи касалликларидан вафот этган болалар сони нисбатан юқори даражада экани танқид қилинди. Шунингдек, вилоят тиббиёт муассасалардаги врачларга ажратилган штат (7 602.5) бирлигидан ҳозирда 3 612 та (47,5 фоиз) штат бирлиги вакант эканлиги таъкидланди. Бундан ташқари, тўлиқ тиббий жиҳозлар билан таъминланмагани, жумладан, 99 та оилавий поликлиниканинг бирортасида УЗИ аппарати йўқлиги айтилди.
Мажлисда учраётган тизимли хато ва камчиликларни бартараф этиш мақсадида комиссия аъзолари томонидан тавсиялар берилиб, тегишли қарорлар қабул қилинди.
Эслатиб ўтамиз, 24 апрелда Сенатнинг Суд-ҳуқуқ масалалари ва коррупцияга қарши курашиш қўмитаси раиси Наримон Умаров Ўзбекистонда ўтган йилга нисбатан гўдаклар ва оналар ўлими ошганини айтганди. Қўмита раиси Ўзбекистонда репродуктив саломатликни, оналик ва болаликни муҳофаза қилишга оид қонун ҳужжатлари ижросини таъминлашдаги камчиликлар оқибатида 2019 йилга нисбатан гўдаклар ўлими 428 тага (2019 йилда 6432 та, 2020 йилда эса 6860 та), оналар ўлими 10 тага (145-155) ошганини маълум қилганди.
Изоҳ (0)