Sergeli tumanidagi Cho‘ponota, Kichik halqa avtomobil yo‘li, Toshkent halqa avtomobil yo‘li va Qipchoq ko‘chalari o‘rtasida joylashgan olti polosali avtomobil yo‘li hamda uchta yo‘l o‘tkazgichni qurish loyihasining qiymati oshdi. Bu haqda Davlat xaridlari portal ma’lumotlariga tayanib, “Gazeta.uz” xabar berdi. Loyiha Grand Road Tashkent korxonasi bilan hamkorlikda amalga oshirilmoqda.
Portal ma’lumotlariga ko‘ra, poytaxt hokimligi huzuridagi “Yagona buyurtmachi xizmati” 2020-yilning 6-iyulida Grand Road Tashkent bilan shartnoma tuzgan. O‘shanda amalga oshiriladigan ishlar qiymati 280,9 milliard so‘mga (Markaziy bankning o‘sha kungi kursi bo‘yicha 27,6 million dollarga) baholangan. Shartnomada ushbu mablag‘ loyiha-smeta hujjatlari doirasida aniqlanishi va amalga oshirilgan ishlarni hisobga olgan holda belgilanishi kerakligi ta’kidlangan. Ishlarni Moliya vazirligining ssudalari hisobiga moliyalashtirish rejalashtirilgan.
2020-yilning 25-iyunida Vazilar Mahkamasining farmoyishi (313-f sonli) imzolangan bo‘lib, unga binoan obyektni qisqa vaqt ichida loyihalashtirish, qurish va ishga tushirish uchun istisno tariqasida buyurtmachi sifatida “Yagona buyurtmachi xizmati”, bosh loyihachi — Allegro Develop Plas, bosh pudratchi — Grand Road Tashkent tanlangan. Hujjat bilan loyihaga Turkiyaning Kalyon kompaniyasini jalb etishga ruxsat berilgan.
Farmoyish orqali, shuningdek, 2020-yil 31-dekabrga qadar loyiha-smeta hujjatlarini tayyorlash bilan bir vaqtda qurilish-montaj ishlarini amalga oshirishga ruxsat berilgan. Ushbu hujjat bilan loyihani tendersiz amalga oshirishga ham ruxsat berilgan.
2021-yil 19-may kuni buyurtmachi va Grand Road Tashkent o‘rtasida qo‘shimcha bitim imzolangan bo‘lib, uning doirasida amalga oshiriladigan ishlar qiymati 518,3 milliard so‘mga qadar oshirilgan (21-may holatiga ko‘ra, qariyb 49 million dollar). Ushbu mablag‘ o‘z ichiga qurilish zonasidan kommunikatsiyalarni olib tashlash bo‘yicha 51,8 milliard so‘mlik xarajatlarni ham o‘z ichiga oladi.
Eslatib o‘tamiz, 2020-yilning sentabrida uchta yo‘l o‘tkazgich va olti polosali yo‘lning qurilish to‘g‘risida xabar berilgandi. Birinchi yo‘l o‘tkazgichni Kichik halqa avtomobil yo‘li va Cho‘ponota ko‘chasi kesishmasiga qurish rejalashtirilgan. Sergeli tumani yo‘nalishi bo‘yicha olti polosali yo‘l yotqiziladi va bu yerda Toshkent halqa yo‘li bilan kesishgan joyda ikkinchi yo‘l o‘tkazgich quriladi. Uchinchi bog‘lama yo‘lni Sergeli tumanidagi Qipchoq ko‘chasi bilan bog‘laydi.
O‘zbekiston Prezidenti 2020-yilning iyunida Sergelini Toshkent markazi bilan bog‘laydigan 5,6 kilometrli yangi ko‘chani qurish loyihasining taqdimoti bilan tanishgandi.
Sentabr oyida O‘zbekiston tomonidan loyiha rahbari Timur Samutdinov Artel xoldingining Allegro Develop Plast loyiha instituti Kalyon Trafik eskizlarini O‘zbekiston standartlariga moslashtirishini ma’lum qilgandi.
Loyihaning ko‘prik qurilishi rahbari, muhandis-quruvchi Tekin Eker Kichik halqa avtomobil yo‘li va Cho‘ponota ko‘chasi kesishmasidagi ko‘prik balandligi 13 metrga teng 47 ta ustunga ega bo‘lishini ta’kidlagan. Yo‘l o‘tkazgichning umumiy uzunligi 587 metrni tashkil etadi, estakada burilishlari bilan 950 metrga yetadi.
Korxona va tashkilotlarning yagona davlat registr ma’lumotlariga ko‘ra, Grand Road Tashkent 2018-yilning 20-noyabrida Uchtepa tumanida ro‘yxatdan o‘tkazilgan. Asosiy faoliyat turi — yo‘llar va shosselar qurish.
DUK ta’sischisi sifatida Toshkent hokimligining “Munitsipal aktivlarni boshqarish markazi” (37,9 foiz) ko‘rsatilgan, Turkiyaning Grandway İnşaat Yatırım Anonim Şirketi’ga ham 2018-yilning 18-oktabrida asos solingan.
Grand Road Tashkent 2020-yilda Toshkent ko‘chalarini kapital ta’mirlash bo‘yicha qator loyihalarni amalga oshirgan.
Izoh (0)