Сергели туманидаги Чўпонота, Кичик ҳалқа автомобиль йўли, Тошкент ҳалқа автомобиль йўли ва Қипчоқ кўчалари ўртасида жойлашган олти полосали автомобиль йўли ҳамда учта йўл ўтказгични қуриш лойиҳасининг қиймати ошди. Бу ҳақда Давлат харидлари портал маълумотларига таяниб, «Gazeta.uz» хабар берди. Лойиҳа Grand Road Tashkent корхонаси билан ҳамкорликда амалга оширилмоқда.
Портал маълумотларига кўра, пойтахт ҳокимлиги ҳузуридаги «Ягона буюртмачи хизмати» 2020 йилнинг 6 июлида Grand Road Tashkent билан шартнома тузган. Ўшанда амалга ошириладиган ишлар қиймати 280,9 миллиард сўмга (Марказий банкнинг ўша кунги курси бўйича 27,6 миллион долларга) баҳоланган. Шартномада ушбу маблағ лойиҳа-смета ҳужжатлари доирасида аниқланиши ва амалга оширилган ишларни ҳисобга олган ҳолда белгиланиши кераклиги таъкидланган. Ишларни Молия вазирлигининг ссудалари ҳисобига молиялаштириш режалаштирилган.
2020 йилнинг 25 июнида Вазилар Маҳкамасининг фармойиши (313-ф сонли) имзоланган бўлиб, унга биноан объектни қисқа вақт ичида лойиҳалаштириш, қуриш ва ишга тушириш учун истисно тариқасида буюртмачи сифатида «Ягона буюртмачи хизмати», бош лойиҳачи — Allegro Develop Plast, бош пудратчи — Grand Road Tashkent танланган. Ҳужжат билан лойиҳага Туркиянинг Калён компаниясини жалб этишга рухсат берилган.
Фармойиш орқали, шунингдек, 2020 йил 31 декабрга қадар лойиҳа-смета ҳужжатларини тайёрлаш билан бир вақтда қурилиш-монтаж ишларини амалга оширишга рухсат берилган. Ушбу ҳужжат билан лойиҳани тендерсиз амалга оширишга ҳам рухсат берилган.
2021 йил 19 май куни буюртмачи ва Grand Road Tashkent ўртасида қўшимча битим имзоланган бўлиб, унинг доирасида амалга ошириладиган ишлар қиймати 518,3 миллиард сўмга қадар оширилган (21 май ҳолатига кўра, қарийб 49 миллион доллар). Ушбу маблағ ўз ичига қурилиш зонасидан коммуникацияларни олиб ташлаш бўйича 51,8 миллиард сўмлик харажатларни ҳам ўз ичига олади.
Эслатиб ўтамиз, 2020 йилнинг сентябрида учта йўл ўтказгич ва олти полосали йўлнинг қурилиш тўғрисида хабар берилганди. Биринчи йўл ўтказгични Кичик ҳалқа автомобиль йўли ва Чўпонота кўчаси кесишмасига қуриш режалаштирилган. Сергели тумани йўналиши бўйича олти полосали йўл ётқизилади ва бу ерда Тошкент ҳалқа йўли билан кесишган жойда иккинчи йўл ўтказгич қурилади. Учинчи боғлама йўлни Сергели туманидаги Қипчоқ кўчаси билан боғлайди.
Ўзбекистон Президенти 2020 йилнинг июнида Сергелини Тошкент маркази билан боғлайдиган 5,6 километрли янги кўчани қуриш лойиҳасининг тақдимоти билан танишганди.
Сентябрь ойида Ўзбекистон томонидан лойиҳа раҳбари Тимур Самутдинов Artel холдингининг Allegro Develop Plast лойиҳа институти Kalyon Trafik эскизларини Ўзбекистон стандартларига мослаштиришини маълум қилганди.
Лойиҳанинг кўприк қурилиши раҳбари, муҳандис-қурувчи Текин Экер Кичик ҳалқа автомобиль йўли ва Чўпонота кўчаси кесишмасидаги кўприк баландлиги 13 метрга тенг 47 та устунга эга бўлишини таъкидлаган. Йўл ўтказгичнинг умумий узунлиги 587 метрни ташкил этади, эстакада бурилишлари билан 950 метрга етади.
Корхона ва ташкилотларнинг ягона давлат регистр маълумотларига кўра, Grand Road Tashkent 2018 йилнинг 20 ноябрида Учтепа туманида рўйхатдан ўтказилган. Асосий фаолият тури — йўллар ва шосселар қуриш.
ДУК таъсисчиси сифатида Тошкент ҳокимлигининг «Муниципал активларни бошқариш маркази» (37,9 фоиз) кўрсатилган, Туркиянинг Grandway İnşaat Yatırım Anonim Şirketi’га ҳам 2018 йилнинг 18 октябрида асос солинган.
Grand Road Tashkent 2020 йилда Тошкент кўчаларини капитал таъмирлаш бўйича қатор лойиҳаларни амалга оширган.
Изоҳ (0)