Magistral shatakchilar uchun avtonom boshqaruv tizimlarini yaratish bilan shug‘ullanuvchi TuSimple texnologik startapi o‘zining yangi texnologiyasining qanchalik samaradorligini namoyish etdi. Buning uchun kompaniya ichiga tarvuz ortilgan yuk mashinasini Arizonadan Texasga — 1450 kilometr masofaga avtopilotda yubordi. Avtopilot yakuniy marshrutga rulda odam bo‘lganidan ancha tezroq yetib borgan, deb xabar beradi Motor.
Haydovchisiz texnologiyalar yuk tashish samaradorligini oshirishga yordam beradi, shu sababli kompaniya texnologiyaning afzalliklarini real misollarda isbotlab berishga tayyor. Startap shu kabi namoyishlardan biri uchun meva va sabzavotlarni yetkazib berish bilan shug‘ullanuvchi Giumarra Companies hamda Associated Wholesale Groces ulgurji kompaniyasi bilan birlashgan. Ular birgalikda tarvuzlar partiyasini Tuson shahridan (Arizona) Dallasga (Texas) yetkazishni tashkillashtirgan. Boshlang‘ich va yakuniy marshrut orasidagi masofa 1450 kilometrni tashkil etadi.
Yuk mashinasi salonida favqulodda holatlar uchun haydovchi bo‘lganiga qaramay, avtomobil yo‘lning katta qismini avtopilotda bosib o‘tgan — inson yordamida “birinchi va oxirgi milda” kerak bo‘lgan. Odatda bu kabi safar uchun 24 soat-u 6 daqiqa sarflanadi, biroq TuSimple ushbu vazifani 14 soat-u 6 daqiqada uddaladi (42 foiz samarali).
Giumarra Companies prezidenti Tim Raylining so‘zlariga ko‘ra, haydovchisiz texnologiyaning joriy etilishi sohadagi “o‘yin qoidalarini” o‘zgartirib yuboradi va eng muhimi mahsulotlar yetkazib berilishini tezlashtiradi.
TuSimple o‘z avtopilotini to‘rtinchi darajali tizim deya klassifikatsiyalaydi, bu esa haydovchining aralashuvi faqatgina ba’zi hollarda talab etilishini bildiradi. Yuk mashinasidagi datchiklar atrofni 360 daraja bo‘yicha skanerlaydi. Avtopilot ishlaydigan hisoblash platformasi daqiqasiga 600 trillion operatsiyani qayta ishlaydi, bu esa inson bilan taqqoslaganda elektronika 15 karra tez degani.
Avvalroq Xitoy yo‘llarida to‘liq haydovchisiz boshqariladigan taksilar harakatlanishni boshlagani, Microsoft rul va tepkilarsiz avtomobilni yaratgan kompaniyaga 2 mlrd dollar sarmoya kiritgani to‘g‘risida xabar berilgandi.
Izoh (0)