АҚШда автопилотда ҳаракатланган юк машинаси белгиланган масофани ҳайдовчиси бор машиналардан 10 соатга тезроқ босиб ўтди

Магистрал шатакчилар учун автоном бошқарув тизимларини яратиш билан шуғулланувчи TuSimple технологик стартапи ўзининг янги технологиясининг қанчалик самарадорлигини намойиш этди. Бунинг учун компания ичига тарвуз ортилган юк машинасини Аризонадан Техасга — 1450 километр масофага автопилотда юборди. Автопилот якуний маршрутга рулда одам бўлганидан анча тезроқ етиб борган, деб хабар беради Motor.

Ҳайдовчисиз технологиялар юк ташиш самарадорлигини оширишга ёрдам беради, шу сабабли компания технологиянинг афзалликларини реал мисолларда исботлаб беришга тайёр. Стартап шу каби намойишлардан бири учун мева ва сабзавотларни етказиб бериш билан шуғулланувчи Giumarra Companies ҳамда Associated Wholesale Groces улгуржи компанияси билан бирлашган. Улар биргаликда тарвузлар партиясини Тусон шаҳридан (Аризона) Далласга (Техас) етказишни ташкиллаштирган. Бошланғич ва якуний маршрут орасидаги масофа 1450 километрни ташкил этади.

Юк машинаси салонида фавқулодда ҳолатлар учун ҳайдовчи бўлганига қарамай, автомобиль йўлнинг катта қисмини автопилотда босиб ўтган — инсон ёрдамида «биринчи ва охирги милда» керак бўлган. Одатда бу каби сафар учун 24 соат-у 6 дақиқа сарфланади, бироқ TuSimple ушбу вазифани 14 соат-у 6 дақиқада уддалади (42 фоиз самарали).

Giumarra Companies президенти Тим Райлининг сўзларига кўра, ҳайдовчисиз технологиянинг жорий этилиши соҳадаги «ўйин қоидаларини» ўзгартириб юборади ва энг муҳими маҳсулотлар етказиб берилишини тезлаштиради.

TuSimple ўз автопилотини тўртинчи даражали тизим дея классификациялайди, бу эса ҳайдовчининг аралашуви фақатгина баъзи ҳолларда талаб этилишини билдиради. Юк машинасидаги датчиклар атрофни 360 даража бўйича сканерлайди. Автопилот ишлайдиган ҳисоблаш платформаси дақиқасига 600 триллион операцияни қайта ишлайди, бу эса инсон билан таққослаганда электроника 15 карра тез дегани.

Аввалроқ Хитой йўлларида тўлиқ ҳайдовчисиз бошқариладиган таксилар ҳаракатланишни бошлагани, Microsoft руль ва тепкиларсиз автомобилни яратган компанияга 2 млрд доллар сармоя киритгани тўғрисида хабар берилганди.