AQShning sobiq prezidenti Barak Obama Pentagonning maxfiy arxivlarida harakatlanish prinsipi tushunarsiz bo‘lgan uchar likopchalarning fotosuratlari saqlanishi haqida gapirdi.
Obamaning so‘zlariga ko‘ra, prezident bo‘lgach, u AQShda o‘zga sayyoraliklar va ularning kemalari saqlanadigan maxfiy laboratoriyaning bor-yo‘qligi bilan qiziqqan.
“Ma’muriyat xodimlari kichik surishtiruv ishlarini olib borgan va bunday laboratoriyalarning yo‘qligini aytgan”, — deb qo‘shimcha qildi Obama.
Shu bilan birga, sobiq prezidentning aytishicha, AQShda kelib chiqishi noma’lum bo‘lgan uchuvchi jismlarning fotosuratlari mavjud. “Biz ularning qanday harakatlanishi, ularning trayektoriyasini tushuntirib bera olmaymiz”, — deb ta’kidladi u.
2020-yilning avgust oyida Pentagon noma’lum uchar jismlarning (NUJ) paydo bo‘lish holatlarini tekshiruvchi ishchi guruhni yig‘gan edi. Guruhning vazifasi AQSh milliy xavfsizligiga tahdid solishi mumkin bo‘lgan NUJlarni aniqlash, tahlil qilish va ro‘yxatini tuzishdan iborat bo‘ladi.
Ma’lumot uchun, AQSh Mudofaa vazirligi harbiy samolyotlardan tushirilgan “noma’lum jismlar” — tashqi ko‘rinishidan oddiy uchuvchi qurilmalarga o‘xshamaydigan obyektlarning fotosuratlarini e’lon qilgan edi. O‘sha vaqtda prezident bo‘lgan Donald Tramp, uchuvchilarning xabarlariga qaramay, NUJning mavjudligiga shubha bilan qarashini aytgan.
Eslatib o‘tamiz, 2019-yilda AQSh harbiy dengiz kuchlari (HDK)ning ba’zi uchuvchilari mamlakat sharqiy sohillaridagi parvozlar vaqtida noma’lum uchar jismlarga duch kelganini ma’lum qilgan edi.
Izoh (0)