АҚШнинг собиқ президенти Барак Обама Пентагоннинг махфий архивларида ҳаракатланиш принципи тушунарсиз бўлган учар ликопчаларнинг фотосуратлари сақланиши ҳақида гапирди.
Обаманинг сўзларига кўра, президент бўлгач, у АҚШда ўзга сайёраликлар ва уларнинг кемалари сақланадиган махфий лабораториянинг бор-йўқлиги билан қизиққан.
«Маъмурият ходимлари кичик суриштирув ишларини олиб борган ва бундай лабораторияларнинг йўқлигини айтган», — деб қўшимча қилди Обама.
Шу билан бирга, собиқ президентнинг айтишича, АҚШда келиб чиқиши номаълум бўлган учувчи жисмларнинг фотосуратлари мавжуд. «Биз уларнинг қандай ҳаракатланиши, уларнинг траекториясини тушунтириб бера олмаймиз», — деб таъкидлади у.
2020 йилнинг август ойида Пентагон номаълум учар жисмларнинг (НУЖ) пайдо бўлиш ҳолатларини текширувчи ишчи гуруҳни йиғган эди. Гуруҳнинг вазифаси АҚШ миллий хавфсизлигига таҳдид солиши мумкин бўлган НУЖларни аниқлаш, таҳлил қилиш ва рўйхатини тузишдан иборат бўлади.
Маълумот учун, АҚШ Мудофаа вазирлиги ҳарбий самолётлардан туширилган «номаълум жисмлар» — ташқи кўринишидан оддий учувчи қурилмаларга ўхшамайдиган объектларнинг фотосуратларини эълон қилган эди. Ўша вақтда президент бўлган Дональд Трамп, учувчиларнинг хабарларига қарамай, НУЖнинг мавжудлигига шубҳа билан қарашини айтган.
Эслатиб ўтамиз, 2019 йилда АҚШ ҳарбий денгиз кучлари (ҲДК)нинг баъзи учувчилари мамлакат шарқий соҳилларидаги парвозлар вақтида номаълум учар жисмларга дуч келганини маълум қилган эди.
Изоҳ (0)