Isroil va HAMAS o‘t ochishni to‘xtatish haqida kelishib oldi, deb xabar bermoqda Meduza The Times of Israel’ga tayanib.
The Jerusalem Post xabariga ko‘ra, Isroil xavfsizlik masalalari bo‘yicha vazirlar komissiyasi bir ovozdan G‘azo sektoriga zarbalar berishni to‘xtatishni yoqlab ovoz berdi.
Isroil va HAMAS o‘rtasidagi o‘t ochishni to‘xtatish rejimi Falastin va Isroil vaqti bilan 2:00 da (Toshkent vaqti bilan 4:00) kuchga kirdi.
Al Jazeera telekanali xabar qilishicha, G‘azo sektorida va Falastin hududlarida minglab odamlar ko‘chaga chiqib, yarashuvni tantana qilgan. Falastinning Ramollah shahrida mushaklar otildi, ba’zi odamlar quroldan havoga o‘q uzdi.
Isroilning The Times of Israel gazetasi xabariga ko‘ra, yarashuv e’lon qilinib, u kuchga kirgunicha G‘azo yaqinidagi ba’zi Isroil shaharlari raketa va minomyotlar bilan o‘qqa tutilgan. Bir kishi jabrlangan.
O‘t ochishni to‘xtatish rejimi Isroil va HAMAS o‘rtasida Misr vositachiligida o‘rnatildi. Misr xavfsizlik xizmatidagi The Jerusalem Post manbasiga ko‘ra, yarashuv tafsilotlari hali ishlab chiqilmagan. Nashr ma’lumotlari bo‘yicha, bosh vazir Binyamin Netanyaxu va mudofaa vaziridan tashqari barcha Isroil vazirlari Vazirlar mahkamasi majlisiga kelishidan oldin bo‘lg‘usi o‘t ochishni to‘xtatish rejimi haqida chet el OAVlaridan xabar topgan.
19-may kuni AQSh prezidenti Jo Bayden nizo kuchayganidan buyon to‘rtinchi marta Netanyaxu bilan telefon orqali suhbatlashib, “o‘t ochishni to‘xtatish yo‘lidagi ahamiyatli deeskalatsiyani bugundanoq boshlash”ga chaqirgan edi. Isroilga AQSh davlat departamenti vakili yo‘naltirilgan edi.
AQSh davlat kotibi Entoni Blinkenning so‘zlariga ko‘ra, o‘t ochishni to‘xtatish haqidagi bitimni ishlab chiqish imkoniyatlari bo‘yicha maslahatlashuvlar nizoning kuchayishi fonida anchadan buyon davom etmoqda. Ammo AQSh BMT Xavfsizlik kengashida deeskalatsiya va yarashuvga da’vat qilib taklif etilgan birorta ham bayonotni hali qo‘llab-quvvatlamagan.
Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.
Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin guruh raketalar otishni boshladi. Bunga javoban Isroil G‘azo sektorini o‘qqa tutdi.
Izoh (0)