Namangan shahrida 2021-yil 23—31-may kunlari bo‘lib o‘tadigan Xalqaro gullar festivaliga 500 ming nafardan ortiq mehmon kelishi kutilmoqda. Bu haqda Namangan viloyati hokimining o‘rinbosari Botir Nuriddinov ma’lum qildi, deya xabar beradi “Daryo” muxbiri Azizbek Abduvaliyev.
Nuriddinovning aytishicha, bugungi kungacha gullar bayramiga tayyorgarlikni o‘z ko‘zi bilan ko‘rish uchun Namangan shahriga 100 mingga yaqin mehmon kelib-ketgan.
— Xorijda ham mazkur festivalga qiziqish katta. Qirg‘izistonlik bir turoperatorning o‘zi 200 nafar mehmon bilan kelish istagini bildirdi, — deya ta’kidladi viloyat hokimining o‘rinbosari.
Namangan shahri hokimi G‘ofir Jamolovga ko‘ra, Xalqaro gullar festivalida ishtirok etish uchun barcha birodarlashgan shaharlar mutasaddilariga taklifnomalar yuborilgan.
— Ukrainaning Xmelnitskiy shahri ma’muriyati vakillari festivalda ishtirok etish tashabbusi bilan chiqdi. Ular ushbu tadbir davomida Namangan shahri bilan birodarlashish taklifini ham bildirgan, — deydi shahar hokimi.
Gullar bayrami arafasida tashkil etilgan matbuot anjumanida ta’kidlanishicha, festival yakunida tadbirda faol ishtirok etgan gulchilar qimmatbaho sovg‘alar, jumladan, avtomobillar bilan taqdirlanishi ko‘zda tutilgan.
Izoh (0)