Наманган шаҳрида 2021 йил 23—31 май кунлари бўлиб ўтадиган Халқаро гуллар фестивалига 500 минг нафардан ортиқ меҳмон келиши кутилмоқда. Бу ҳақда Наманган вилояти ҳокимининг ўринбосари Ботир Нуриддинов маълум қилди, дея хабар беради «Дарё» мухбири Азизбек Абдувалиев.
Нуриддиновнинг айтишича, бугунги кунгача гуллар байрамига тайёргарликни ўз кўзи билан кўриш учун Наманган шаҳрига 100 мингга яқин меҳмон келиб-кетган.
— Хорижда ҳам мазкур фестивалга қизиқиш катта. Қирғизистонлик бир туроператорнинг ўзи 200 нафар меҳмон билан келиш истагини билдирди, — дея таъкидлади вилоят ҳокимининг ўринбосари.
Наманган шаҳри ҳокими Ғофир Жамоловга кўра, Халқаро гуллар фестивалида иштирок этиш учун барча биродарлашган шаҳарлар мутасаддиларига таклифномалар юборилган.
— Украинанинг Хмельницкий шаҳри маъмурияти вакиллари фестивалда иштирок этиш ташаббуси билан чиқди. Улар ушбу тадбир давомида Наманган шаҳри билан биродарлашиш таклифини ҳам билдирган, — дейди шаҳар ҳокими.
Гуллар байрами арафасида ташкил этилган матбуот анжуманида таъкидланишича, фестиваль якунида тадбирда фаол иштирок этган гулчилар қимматбаҳо совғалар, жумладан, автомобиллар билан тақдирланиши кўзда тутилган.
Изоҳ (0)