Axborot va ommaviy kommunikatsiyalar agentligida “Aholining ichimlik suvi bo‘yicha debitor qarzdorligi va tarmoqqa noqonuniy ulanishlarning oldini olish” mavzusida o‘tkazilgan matbuot anjumanida O‘zbekiston bo‘yicha suvdan qarzdorlik 674,1 milliard so‘mga yetgani ma’lum qilindi.
Mavjud qarzdorlikning 555,8 milliard so‘mi aholi, 118,2 milliard so‘mi esa yuridik iste’molchilar hissasiga to‘g‘ri keladi.
“O‘zsuvta’minot” mutasaddilari ishtirok etgan tadbirda qayd etilishicha, 2021-yilning birinchi choragida elektron to‘lov tizimlari orqali 39,3 milliard so‘m kelib tushgan, ushbu ko‘rsatkich o‘tgan yilning mos davriga (22,8 milliard so‘m) nisbatan 72 foizga oshgan.
Bugungi kunda 2444 nafar nazoratchi ishga qabul qilinib, ular 2 368 ta (97 foiz) terminal va 2 587 ta (106 foiz) termoprinter bilan ta’minlangan.
2021-yil birinchi choragida pul undiruvi 349 milliard so‘mni tashkil etib, o‘tgan yilning mos davriga nisbatan 122 milliard so‘m yoki 54 foizga oshgan. Hududiy korxonalar tomonidan 63,5 milliard so‘m qarzdorlik fuqarolik va iqtisodiy sudlarga taqdim qilingan.
Markazlashgan ichimlik suvi xizmatlari mavjud bo‘lgan 741 ta MFYdagi shartnomasiz ravishda ichimlik suvdan foydalanib kelayotgan 23 343 ta iste’molchi (90 932 aholi) aniqlangan va ular bilan “Suvta’minot” MChJlar shartnomalar rasmiylashtirishga hamda 7,826 milliard so‘m undirilishiga erishilgan.
Eslatib o‘tamiz, mart oyida o‘tkazilgan matbuot anjumanida respublikadagi 10 271 ta mahalla o‘rganilgani, ularning 8006 tasi suv bilan ta’minlangani, qolgan 2265 tasida esa umuman suv ta’minoti yo‘qligi aniqlangani to‘g‘risida xabar berilgandi.
Izoh (0)