Toshkent viloyati Qibray tumanidagi qulupnay dalasida ishlagan dehqonlarga vayron qilingan hosil uchun 20-may kuni tovon puli to‘lab berildi. Bu haqda viloyat hokimligi matbuot xizmati “Gazeta.uz”ga ma’lum qildi.
Avvalroq “Chinkeldi” mahallasida buldozer qulupnay ekilgan 8 gektar yer yo‘q qilingani xabar berilgan edi. Tuman hokimligi bu yer maydonlari “Yangi O‘zbekiston” bog‘i, “Istiqlol” majmuasi va boshqa obyektlarni qurish uchun davlat ehtiyojlari uchun olinganini ma’lum qilgandi.
Tuman hokimligi yangi bog‘ni barpo etish haqida ko‘rsatma bergach, dehqonlarga ogohlantirish xatlari yuborilganini, ular bilan kelishuvlar imzolanib, keltirilgan zararni qoplash bo‘yicha dalolatnomalar rasmiylashtirilganini bildirgandi.
Tuman hokimligi qishloq xo‘jaligi masalalari bo‘limi boshlig‘ining o‘rinbosari Hamidulla To‘raxo‘jayevning “Kun.uz”ga ma’lum qilishicha, dastlabki kelishuv fermerlar bilan ham, dehqonlar bilan ham tuzilgan.
“Fermer xo‘jaligida 20,2 gektar yer maydoni mavjud. Shu yer maydonidan 12 gektar bog‘i bor, o‘sha bog‘ning oralig‘iga 8 gektar qulupnay ekilgan. Davlat ehtiyojiga olishda fermer bilan kelishilgan edi. Dehqonlar ham bo‘shatib berishga rozi bo‘lishdi. O‘shanda terilmagan qulupnay uchun bir gektariga 50 million so‘m, yarmidan o‘tgan, ya’ni terilgan maydonlar uchun gektariga kamida 24 million so‘m tovon puli to‘lashga kelishildi”, — degan u.
Hamidulla To‘raxo‘jayevning ta’kidlashicha, ushbu yer maydonida 9 nafar dehqon qulupnay ekib dehqonchilik qilgan.
“Biz dalolatnomalar tuzilib, qiymatni chiqarish uchun ekspertizaga berilgani, narxlash ishlari yakunlanib tasdiqlangach, hujjatlar moliya bo‘limiga taqdim etilishi hamda tovon pullari to‘lanishini aytganimizda to‘g‘ri tushunishgandi”, — deya oydinlik kiritgan Hamidulla To‘raxo‘jayev. Uning so‘zlariga ko‘ra, oradan 4-5 kun o‘tgach, dehqonlarda ishonchsizlik paydo bo‘lib, to‘lamayapsizlar, degan ma’noda shunday yo‘l tutgan. Shuningdek, tarqalgan videoda kartoshka ekilgan maydon buzilayotgan, bog‘ oralariga ekilgan qulupnayzorlar oldinroq buzilganini bildirgan.
Hokimlik mutasaddisining aytishicha, 20,2 gektar maydonidagi bog‘ va ekinlar uchun jami 850 million so‘m tovon puli to‘lash nazarda tutilmoqda. Yakuniy raqam ekspertiza xulosasidan so‘ng aniq bo‘ladi. Qulupnay maydoni uchun ajratilgan 192 million so‘m ham shu summaning ichida. Bugungi kunda ularga jami 154 million so‘m tovon pullari to‘landi.
Qibray tuman hokimligining “Gazeta.uz”ga ma’lum qilishicha, dehqonlar qolgan qulupnay hosili uchun 1 gektarga 20 million so‘m to‘lovga rozi bo‘lgan. Ulardan qulupnay ekini uchun qilingan xarajatlari qoplangani, e’tirozlari yo‘qligi haqida tilxatlar olingan.
Tovon puli olgan dehqonlar fermer xo‘jaligi yer maydoniga, shuningdek, sedana, loviya, kartoshka urug‘i ham qadalganini bildirgan. Hamidulla To‘raxo‘jayev ekilgan boshqa ekinlar uchun tovon pullari baholash ekspertizasi o‘tkazilgach, yana to‘lanishini bildirgan.
Izoh (0)