DXX va IIV xodimlari tomonidan o‘tkazilgan tezkor tadbirda Toshkent viloyati Qibray tumanida yashovchi ikki nafar fuqaro “Salar” shaharchasi hududidagi 2 gektar yer maydonini 1 million 10 ming AQSh dollariga sotgan vaqtlarida ashyoviy dalillar bilan ushlandi. Bu haqda “O‘zbekiston 24” telekanali orqali ma’lum qilindi.
Tergovga qadar tekshiruv harakatlari davomida aniqlanishicha, mazkur yer maydoni 2018-yil Qibray tumani hokimining tegishli qarori bilan qurilish materiallari ishlab chiqarish sexi tashkil etish uchun Toshkent shahrida yashovchi 58 yoshli fuqaroga ajratib berilgan, lekin bugunga qadar ushbu manzilda hech qanday amaliy ish qilinmagan.
Hozirda mazkur yer egasini tergov harakatlariga jalb etish choralari ko‘rilmoqda.
Shuningdek, Buxoro viloyati Peshku tumanida yashovchi, muqaddam shu tizimida ishlagan ikki nafar fuqaro qurilish bilan shug‘ullanuvchi MChJ rahbarining ishonchiga kirib, unga mazkur tuman hududida ko‘p qavatli uy-joy qurish uchun ajratilgan 19 sotix yer maydonini hokimiyatdagi mansabdor tanishlari orqali olib berishni aytib, evaziga 38 ming AQSh dollari talab qilgan.
DXX Buxoro viloyati boshqarmasi hamda Bosh prokuratura huzuridagi departamentning hududiy boshqarmasi xodimlari tomonidan o‘tkazilgan tezkor tadbirda firibgar shaxslar so‘ralgan pulni olgan vaqtlarida ushlangan.
DXX Surxondaryo viloyati boshqarmasi hamda departament xodimlari tomonidan o‘tkazilgan tezkor tadbirda viloyat hokimligining qurilish majmuasi sobiq xodimi, Termiz shahrida yashovchi ayol Bandixon tumanida joylashgan o‘zining nomidagi MChJ balansida bo‘lgan 2 gektar sug‘oriladigan yer maydonini 30 ming dollarga sotgan vaqtida qo‘lga olingan.
Aniqlanishicha, ushbu yer maydoni 2020-yil viloyat hokimligi huzuridagi yer uchastkalari berish masalalarini ko‘rib chiquvchi komissiyaning yig‘ilish bayoni asosida issiqxona qurish maqsadida bepul ajratilgan, biroq, hozirga qadar hech qanday amaliy ish qilinmagan.
Toshkent shahar Yakkasaroy tumanida istiqomat qiluvchi shaxs 148 ming AQSh dollari evaziga mansabdor tanishlari orqali Yangihayot tumani hududidan 14 sotix yer maydonini tegishli hujjatlarini rasmiylashtirib, olib berishni va’da qilgan. O‘tkazilgan tezkor tadbirda u 20 ming dollarni avans sifatida olgan vaqtida ushlangan.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Bo‘stonliqda 10 gektar yerni qariyb 2 million dollarga sotmoqchi bo‘lgan shaxslar qo‘lga olingani, Navoiyda o‘zganing yer maydonini 47 million so‘mga sotib yubormoqchi bo‘lgan shaxs qo‘lga tushgani, Andijonda 6 gektar yerni 18 ming dollarga sotmoqchi bo‘lgan fermer xo‘jaligi rahbariga jinoyat ishi qo‘zg‘atilgani, To‘rtko‘lda fuqaroga 30 million so‘mga 10 gektar yer olib berishni va’da qilgan shaxs ushlangani hamda Toshkent viloyatida qariyb 160 gektar yer noqonuniy o‘zlashtirib olingani haqida xabar berilgandi.
Izoh (0)