Toshkent viloyatining Bo‘stonliq tumanida 10 gektar yerni qariyb 2 million dollarga sotmoqchi bo‘lgan shaxslar ushlandi, deb xabar beradi viloyat IIBB axborot xizmati.

Foto: Toshkent viloyati IIBB axborot xizmati

Ma’lum qilinishicha, 19-aprel kuni S.X. va X.S. ismli fuqarolar Ichki ishlar vazirligiga ariza bilan murojaat qilib, Muhammadjon ismli shaxs Bo‘stonliq tuman hokimining investitsiya kiritish sharti bilan ajratilgan 10 gektar yer maydonini 1,9 million dollarga hokimlik orqali hujjatlashtirib berish orqali sotmoqchi ekanini bildirgan. Ushbu yer maydoni “Navobod” mahallasi hududida joylashgan bo‘lib, “Al-Inobat” MChJga tegishli oromgoh va baliqchilik ko‘li tashkil qilish uchun ajratilgan.

Fuqarolar “sotuvchi” aytilgan pulning 50 ming dollarini talab qilayotgani va unga nisbatan qonuniy chora ko‘rishni so‘ragan.

Mazkur arizaga asosan, 23-aprel kuni IIV Korrupsiya va iqtisodiy jinoyatlarga qarshi kurashish boshqarmasi xodimlari hamda Bosh prokuratura huzuridagi departamentning Toshkent viloyati boshqarmasi xodimlari hamkorligida tezkor tadbir o‘tkazilgan.

Tadbir davomida davomida, 6 nafar shaxs Toshkent shahri Chilonzor tumani 4-mavze 65-uy oldidagi avtoturargohda nazoratdagi ariza mualliflaridan 50 ming AQSh dollari olgan vaqtida ashyoviy dalillar bilan ushlangan.

Mazkur holat yuzasidan Bosh prokuratura huzuridagi departamentning Toshkent viloyati boshqarmasi tomonidan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.

Avvalroq Navoiyda o‘zganing yer maydonini 47 million so‘mga sotib yubormoqchi bo‘lgan shaxs qo‘lga tushgani, Andijonda 6 gektar yerni 18 ming dollarga sotmoqchi bo‘lgan fermer xo‘jaligi rahbariga jinoyat ishi qo‘zg‘atilgani, To‘rtko‘lda fuqaroga 30 million so‘mga 10 gektar yer olib berishni va’da qilgan shaxs ushlangani hamda Toshkent viloyatida qariyb 160 gektar yer noqonuniy o‘zlashtirib olingani haqida xabar berilgandi.