ДХХ ва ИИВ ходимлари томонидан ўтказилган тезкор тадбирда Тошкент вилояти Қибрай туманида яшовчи икки нафар фуқаро «Салар» шаҳарчаси ҳудудидаги 2 гектар ер майдонини 1 миллион 10 минг АҚШ долларига сотган вақтларида ашёвий далиллар билан ушланди. Бу ҳақда «Ўзбекистон 24» телеканали орқали маълум қилинди.
Терговга қадар текширув ҳаракатлари давомида аниқланишича, мазкур ер майдони 2018 йил Қибрай тумани ҳокимининг тегишли қарори билан қурилиш материаллари ишлаб чиқариш цехи ташкил этиш учун Тошкент шаҳрида яшовчи 58 ёшли фуқарога ажратиб берилган, лекин бугунга қадар ушбу манзилда ҳеч қандай амалий иш қилинмаган.
Ҳозирда мазкур ер эгасини тергов ҳаракатларига жалб этиш чоралари кўрилмоқда.
Шунингдек, Бухоро вилояти Пешку туманида яшовчи, муқаддам шу тизимида ишлаган икки нафар фуқаро қурилиш билан шуғулланувчи МЧЖ раҳбарининг ишончига кириб, унга мазкур туман ҳудудида кўп қаватли уй-жой қуриш учун ажратилган 19 сотих ер майдонини ҳокимиятдаги мансабдор танишлари орқали олиб беришни айтиб, эвазига 38 минг АҚШ доллари талаб қилган.
ДХХ Бухоро вилояти бошқармаси ҳамда Бош прокуратура ҳузуридаги департаментнинг ҳудудий бошқармаси ходимлари томонидан ўтказилган тезкор тадбирда фирибгар шахслар сўралган пулни олган вақтларида ушланган.
ДХХ Сурхондарё вилояти бошқармаси ҳамда департамент ходимлари томонидан ўтказилган тезкор тадбирда вилоят ҳокимлигининг қурилиш мажмуаси собиқ ходими, Термиз шаҳрида яшовчи аёл Бандихон туманида жойлашган ўзининг номидаги МЧЖ балансида бўлган 2 гектар суғориладиган ер майдонини 30 минг долларга сотган вақтида қўлга олинган.
Аниқланишича, ушбу ер майдони 2020 йил вилоят ҳокимлиги ҳузуридаги ер участкалари бериш масалаларини кўриб чиқувчи комиссиянинг йиғилиш баёни асосида иссиқхона қуриш мақсадида бепул ажратилган, бироқ, ҳозирга қадар ҳеч қандай амалий иш қилинмаган.
Тошкент шаҳар Яккасарой туманида истиқомат қилувчи шахс 148 минг АҚШ доллари эвазига мансабдор танишлари орқали Янгиҳаёт тумани ҳудудидан 14 сотих ер майдонини тегишли ҳужжатларини расмийлаштириб, олиб беришни ваъда қилган. Ўтказилган тезкор тадбирда у 20 минг долларни аванс сифатида олган вақтида ушланган.
Ҳозирда ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Бўстонлиқда 10 гектар ерни қарийб 2 миллион долларга сотмоқчи бўлган шахслар қўлга олингани, Навоийда ўзганинг ер майдонини 47 миллион сўмга сотиб юбормоқчи бўлган шахс қўлга тушгани, Андижонда 6 гектар ерни 18 минг долларга сотмоқчи бўлган фермер хўжалиги раҳбарига жиноят иши қўзғатилгани, Тўрткўлда фуқарога 30 миллион сўмга 10 гектар ер олиб беришни ваъда қилган шахс ушлангани ҳамда Тошкент вилоятида қарийб 160 гектар ер ноқонуний ўзлаштириб олингани ҳақида хабар берилганди.
Изоҳ (0)