Qashqadaryo viloyatining Muborak tumanida qo‘shnilarining qo‘y-qo‘zilarini o‘g‘irlab, so‘yib sotishni kasb qilib olgan fuqaro 3 yil muddatga ozodlikdan mahrum qilindi. Bu haqda “Daryo”ga Jinoyat ishlari bo‘yicha tuman sudi raisi Alisher Qahhorov xabar berdi.
Ma’lum bo‘lishicha, Muborak tumanining “Muborak” mahallasida istiqomat qiluvchi 38 yoshli fuqaro Azamat Sobirov (ism-familiya o‘zgartirilgan) 2020-yilning 5-dekabridan 2021-yilning 5-fevraliga qadar bo‘lgan vaqt oralig‘ida qo‘shnilariga tegishli o‘n boshga yaqin qo‘y-qo‘zilarni ularning molxonasidan o‘g‘irlab chiqib, so‘yib sotishni kasb qilib olgan.Jumladan, u 2020-yilning 5-dekabridan 6-dekabrga o‘tar kechasi qo‘shnisining hovlisiga devordan oshib tushib, molxonasidagi qiymati 1 million 200 ming so‘m bo‘lgan qo‘zini o‘g‘irlab chiqib, qurilishi bitmagan binoga olib borgan va so‘yib o‘zga shaxsga sotgan. U jinoiy qilmishini davom ettirib, 2020-yilning 15-dekabridan 16-dekabrga o‘tar kechasi yana bir qo‘shnisining hovlisiga yashirin ravishda kirib, molxonasidan narxi 2 million 400 ming so‘m bo‘lgan ikki bosh qo‘zini o‘g‘irlab ketgan. Qo‘zilarni qurilishi bitmagan binoga olib borib, so‘ygan va go‘shtini o‘ziga tanish bo‘lgan fuqarolarga sotgan.
“Sudlanuvchi 2020-yilning 5-dekabridan 2021-yilning 5-fevraliga qadar bo‘lgan vaqt davomida bir nechta fuqaroga tegishli qo‘y-qo‘zilarni ularning hovlisidan o‘g‘irlab chiqib, so‘yib sotgan. Va pulini o‘z ehtiyojlari uchun sarflagan”, — deydi sudya Alisher Qahhorov.
Jinoyat ishlari bo‘yicha Muborak tuman sudi qo‘y-qo‘zi o‘g‘irlab, so‘yib sotishni kasb qilib olgan 38 yoshli fuqaroni Jinoyat kodeksining 169-moddasi 3-qismi “a” bandi (takroran yoki xavfli retsidivist tomonidan o‘g‘rilik) bilan ayblab, uni 3 yil muddatga ozodlikdan mahrum qildi.
Izoh (0)