Toshkent viloyatining Angren shahrida va poytaxtning Mirobod tumanida ma’lum miqdordagi pul evaziga OTMga o‘qishga kiritib qo‘ymoqchi bo‘lgan shaxslar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, Angren shahrida R.A. ismli fuqaro O.ning ishonchiga kirib, uni 3,5 ming dollar evaziga tanishlari orqali Jismoniy tarbiya va sport universitetiga kiritib qo‘yishga va’da bergan. Oldindan 1,5 ming dollarni olgan vaqtda ashyoviy dalillar bilan ushlangan.
Bundan tashqari, departament hamda DXXning Mirobod tumani bo‘limlari tomonidan o‘tkazilgan tezkor tadbirda fuqaro P.A. fuqaro S.ni tanishlari orqali Moskva davlat universitetining Toshkent shahridagi filialiga 1,5 ming dollar evaziga o‘qishga kiritib qo‘ymoqchi bo‘lgani aniqlangan. Kelishilgan pullarni olgan vaqtda ashyoviy dalillar bilan ushlangan.
Ushbu holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Qoraqalpoq davlat universitetiga o‘qishga kiritib qo‘yish uchun 5 ming dollar so‘ragan shaxslar qo‘lga olingani, Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol ushlangani to‘g‘risida xabar berilgandi.
Izoh (0)