Toshkent yoshlarini katta tadbir kutmoqda

Toshkent shahar hokimligi yoshlar uchun katta tadbir – Toshkent Besh tashabbus harakatini tashkil etmoqda. Uning doirasida 21-maydan 25-mayga qadar madaniy va intellektual tanlovlar, sport musobaqalari, mediatreninglar, poytaxtning mashhur kishilari bilan uchrashuvlar va boshqa tadbirlar bo‘lib o‘tadi.

Dasturning yorqin voqealari sifatida Tashkent Dance Fest va Tashkent Voice Fest raqs hamda vokal tanlovlarini ko‘rsatish mumkin. Ular bo‘yicha oldindan onlayn-saralash o‘tkazildi. Xususan, vokal ijro tanlovi bo‘yicha qo‘shimcha jonli eshituv uyushtirildi. Uning yakunlariga ko‘ra, 200 nafar xohlovchidan faqat 30 ishtirokchi qoldi.

Shuningdek, mashhur “Zakovat” intellektual o‘yini bo‘yicha ham alohida turnir bo‘lib o‘tadi. Uning tashkilotchisi — Xushnudbek Xudoyberdiyev.

Yoshlar festivali uchun maxsus bunyod etilgan shaharcha hududidagi maxsus devorlarda yosh rassomlar Street Art tanlovi doirasida ijodkorlik mahoratini namoyish etadi. Tadbir mehmonlari o‘zlariga yoqqan suratga ovoz berishlari mumkin.

Sport ixlosmandlari uchun futbol, Street Ball, stol tennisi, armrestling va Street Workout bo‘yicha musobaqalar tashkil etiladi. Bundan tashqari, yoshlar o‘rtasida zamonaviy beshkurash qoidalari asosida Laser Run musobaqasi bo‘lib o‘tadi. Qolaversa, tadbir hududida skeyter va rollerlar uchun skeyt-park ham barpo etilmoqda.

Project X ideatoni va Tashkent Cyber Cup 2021 musobaqasida yosh IT-mutaxassislar o‘z bilim va ko‘nikmalarini ko‘rsatishadi. Birinchi tanlovda ishtirokchilar jamoalarga bo‘lingan holda ta’lim va innovatsiyalar, ishsizlikka qarshi kurash, sog‘likni saqlash va ekologiya yo‘nalishlarida loyihalar ishlab chiqadi va eng yaxshi startap tadbir homiylari tomonidan moliyalashtiriladi. Tashkent Cyber Cup 2021 musobaqasida esa ishtirokchilar Counter-Strike: Global Offensive bo‘yicha kuch sinashadi. O‘yinlar to‘qqiz soatdan davom etadi.

Faol, zamonaviy va maqsad sari intiladigan qizlar uchun Ayollar netvorkingi haftaligi o‘tkaziladi. Unda jamoalar ilm-fan va texnologiyalar (STEM), biznes, ijtimoiy soha va art bo‘yicha loyihalarni taqdim etadi. Bir vaqtning o‘zida o‘quv treninglari, spikerlar chiqishlari va boshqalar ham bo‘lib o‘tadi. Taklif etilgan mutaxassislar tanlov davomida qizlarga ustozlik qiladi. Taqdimotlar yakunlariga ko‘ra g‘olib jamoa aniqlanadi. U homiylarning moliyaviy ko‘magiga ega bo‘ladi va bu loyihani hayotga tatbiq qilish imkonini beradi.

“Toshkent Besh tashabbus harakati” mehmonlari uchun ham ko‘plab tadbirlar rejalashtirilgan. Ular mediatreninglar, vazirlar, mashhur jurnalistlar, yozuvchilar, blogerlar, vaynerlar bilan uchrashuvlar, qo‘lda yasalgan buyumlar yarmarkasi va modalar namoyishiga tashrif buyurishi mumkin.

Har bir kun mashhur dijeylarning qaynoq musiqiy kechalari va ishtiroki bilan yakunlanadi. DJ Trace, Roger Gunn, DJ Sam, DJ Niki, DJ Voynov ham DJ Endigo raqs maydoniga bayramona kayfiyat baxsh etadi. 23-may kuni 20:00da butun O‘zbekiston bo‘ylab turlar tashkil etishga ulgurgan “Elektrooko” guruhining ikki soatli konserti bo‘lib o‘tadi.

Ro‘yxatdan o‘tgan ishtirokchilar va mehmonlarning umumiy soni 40 ming nafarga yetdi. Lekin mehmonlar soni juda ko‘p bo‘lishi kutilmoqda, chunki kirish uchun oldindan ro‘yxatdan o‘tish shart emas. Buni shundoqqina kirish oldidan ham amalga oshirish mumkin.

Ro‘yxatdan o‘tish www.toshkent21.uz sayti orqali.