Hindistonning Rajastan va Telangana shtatlari rasmiylari qora zamburug‘ deb nomlanuvchi xavfli kasallik — mukormikoz epidemiyasini e’lon qildi. Bu haqda “RBK” xabar berdi.
Ma’lumki, ushbu kasallik birinchi navbatda koronavirus yuqtirganlarga o‘z ta’sirini o‘tkazadi.
Rajastan sog‘liqni saqlash vaziri Axil Aroraning aytishicha, mukormikozni epidemiya deb e’lon qilish, uni COVID-19 bilan birgalikda “kompleks va muvofiqlashtirilgan” holda davolashga imkon beradi.
Shtat ma’muriyatining ma’lumotlariga ko‘ra, mintaqada mukormikoz bilan kasallangan 100 ga yaqin bemor bor, ular uchun Savay Man Singx davlat kasalxonasida maxsus bo‘lim ajratilgan.
Rajastandan keyin Telangana shtati ma’murlari mukormikoz epidemiyasini e’lon qildi.
“Sog‘liqni saqlash bo‘yicha barcha davlat va xususiy muassasalar mukormikozni skrining, diagnostika va davolash bo‘yicha Sog‘liqni saqlash va oilaviy farovonlik vazirligi, Hindiston hukumati va Hindiston tibbiy tadqiqotlar kengashi tomonidan chiqarilgan ko‘rsatmalarga amal qilishi shart”, — deyiladi India Today bergan xabarda.
Barcha tibbiyot muassasalari kasallik to‘g‘risida Sog‘liqni saqlash vazirligiga xabar berishi kerakligi qo‘shimcha qilingan.
Hindistonda COVID-pandemiya fonida odamlarning xavfli zamburug‘larga chalinish holatlari ko‘paydi. Rossiyalik virusologlar mukormikoz kasalligi global xavf keltirib chiqarmasligini aytdi. Shu bilan birga qora zamburug‘ infeksiyasi Rossiyada ham qayd etildi.
Ma’lumot uchun mukormikoz tabiatda keng tarqalgan mikroskopik zamburug‘lar (mukormitsetlar) keltirib chiqaradigan noyob infeksiya. Ular tuproqda yashaydi, ko‘pincha chirigan o‘simliklar va sabzavotlar yuzasida ajralib turadi.
Ushbu infeksiya burun, ko‘z va nafas olish tizimiga ta’sir qiladi. Kasallik burun bo‘shlig‘i va burun yondosh bo‘shliqlarida rivojlanib, ko‘z kosalariga tarqaladi. Infeksiya tushgan a’zolarda, ayniqsa, burunda to‘qima nekrozi tufayli o‘ziga xos qora qo‘tir paydo bo‘ladi.
Izoh (0)