Turkiyaning Istanbul, Rossiyaning Navosibirsk va Qozon shaharlarida ishlash maqsadida borib, pandemiya sharoitida moliyaviy qiyin ahvolda qolgan fuqarolar 11-12-may kunlari O‘zbekistonga qaytarildi, deb xabar beradi Tashqi mehnat migratsiyasi agentligi.
Foto: Tashqi mehnat migratsiyasi agentligi
Ma’lum qilinishicha, ushbu fuqarolar farzandlari bilan xorijda ishsiz hamda boshpanasiz qolib ketgan.
“Mazkur fuqarolarning muammolari Tashqi mehnat migratsiyasi agentligi chora-tadbirlari va Xalqaro migratsiya tashkilotining moliyaviy ko‘magida ijobiy hal etildi”, — deyiladi xabarda.
Xorijda qiyin ahvolda qolgan o‘zbekistonliklarni Toshkent xalqaro aeroportida Tashqi mehnat migratsiyasi agentligi va Xalqaro migratsiya tashkiloti mas’ul xodimlari kutib olgan va ular yashash manziliga kuzatilgan.
Foto: Tashqi mehnat migratsiyasi agentligi
Avvalroq Rossiyada qiyin ahvolda qolgan 9 nafar, Istanbuldan esa 6 nafar o‘zbekistonlik vatanga qaytarilgani to‘g‘risida xabar berilgandi.
