Россиянинг Пенза шаҳрида бахтсиз ҳодисага учраган ўзбекистонлик она ва болага ёрдам кўрсатилди. Бу ҳақда Ташқи меҳнат миграцияси агентлиги хабар берди.
Маълум қилинишича, 2021 йилнинг 28 февралида Пензада андижонлик фуқаро М.Б 3 ёшли фарзанди қаровсиз қолмаслиги учун ишхонасига бирга олиб борган. Шу куни унинг ишхонасида газ баллони портлаши оқибатида она-бола турли даражадаги куйиш жароҳатлари олиб, шифохонага ётқизилган.
Фуқаронинг яқинлари Ташқи меҳнат миграцияси агентлигига ёрдам сўраб мурожаат қилган.
Агентлик томонидан зарур чора-тадбирлар кўрилиши натижасида иш берувчидан 150 минг рубль миқдорида компенсация ундириб берилди, оилавий аҳволи инобатга олиниб, Андижон вилояти ҳокимияти томонидан 15 миллион сўм моддий ёрдам пули ажратилди. Шунингдек, тиббий хизмат сифатини яхшилаш мақсадида Ўзбекистоннинг Россиядаги Бош консулхонаси билан биргаликда Пенза вилояти губернатори билан музокаралар олиб борилиб, фуқаро 17 март куни махсус вертолёт ёрдамида Нижний Новгород шаҳридаги куйиш марказига кўчирилган.
Фуқарога етказилган зарарни суғурта компанияси ва иш берувчидан ундириш мақсадида «Правовой советник» МЧЖдан адвокат ёлланиб, ҳуқуқий чоралар кўрилмоқда.
Агентлик хабарида айтилишича, М.Б.нинг фарзанди саломатлиги барқарорлашгани сабабли 18 май куни Халқаро миграция ташкилоти билан ҳамкорликда яқин қариндоши ҳамроҳлигида Ўзбекистонга қайтарилди. М.Б.нинг ўзи эса ҳомийлар кўмагида Нижний Новгород шаҳридаги махсус шифохонада даволанмоқда.
Аввалроқ Туркиянинг Истанбул, Россиянинг Новосибирск ва Қозон шаҳарларида ишлаш мақсадида бориб, пандемия шароитида молиявий қийин аҳволда қолган жами 7 нафар фуқаро Ўзбекистонга қайтарилганди. Ундан аввал эса Россияда қийин аҳволда қолган 9 нафар, Истанбулдан эса 6 нафар ўзбекистонлик ватанга қайтарилганди.
Изоҳ (0)